Evangelium secundum Ioannem, 20

1. una autem sabbati Maria Magdalene venit mane cum adhuc tenebræ essent ad monumentum et videt lapidem sublatum a monumento

1. Prima autem sabbatorum Maria Magdalene venit ma ne, cum adhuc tenebrae essent, ad monumentum et videt lapidem sublatum a monumento.

2. cucurrit ergo et venit ad Simonem Petrum et ad alium discipulum quem amabat Jesus et dicit eis tulerunt Dominum de monumento et nescimus ubi posuerunt eum

2. Currit ergo et venit ad Simonem Petrum et ad alium discipulum, quem amabat Iesus, et dicit eis: “Tulerunt Dominum de monumento, et nescimus, ubi posuerunt eum!”.

3. exiit ergo Petrus et ille alius discipulus et venerunt ad monumentum

3. Exiit ergo Petrus et ille alius discipulus, et veniebant ad monumentum.

4. currebant autem duo simul et ille alius discipulus præcucurrit citius Petro et venit primus ad monumentum

4. Currebant autem duo simul, et ille alius discipulus praecucurrit citius Petro et venit primus ad monumentum;

5. et cum se inclinasset videt posita linteamina non tamen introivit

5. et cum se inclinasset, videt posita linteamina, non tamen introivit.

6. venit ergo Simon Petrus sequens eum et introivit in monumentum et videt linteamina posita

6. Venit ergo et Simon Petrus sequens eum et introivit in monumentum; et videt linteamina posita

7. et sudarium quod fuerat super caput ejus non cum linteaminibus positum sed separatim involutum in unum locum

7. et sudarium, quod fuerat super caput eius, non cum linteaminibus positum, sed separatim involutum in unum locum.

8. tunc ergo introivit et ille discipulus qui venerat primus ad monumentum et vidit et credidit

8. Tunc ergo introivit et alter discipulus, qui venerat primus ad monumentum, et vidit et credidit.

9. nondum enim sciebant scripturam quia oportet eum a mortuis resurgere

9. Nondum enim sciebant Scripturam, quia oportet eum a mortuis resurgere.

10. abierunt ergo iterum ad semet ipsos discipuli

10. Abierunt ergo iterum ad semetipsos discipuli.

11. Maria autem stabat ad monumentum foris plorans dum ergo fleret inclinavit se et prospexit in monumentum

11. Maria autem stabat ad monumentum foris plorans. Dum ergo fleret, inclinavit se in monumentum

12. et vidit duos angelos in albis sedentes unum ad caput et unum ad pedes ubi positum fuerat corpus Jesu

12. et videt duos angelos in albis sedentes, unum ad caput et unum ad pedes, ubi positum fuerat corpus Iesu.

13. dicunt ei illi mulier quid ploras dicit eis quia tulerunt Dominum meum et nescio ubi posuerunt eum

13. Et dicunt ei illi: “Mulier, quid ploras?”. Dicit eis: “Tulerunt Dominum meum, et nescio, ubi posuerunt eum”.

14. hæc cum dixisset conversa est retrorsum et videt Jesum stantem et non sciebat quia Jesus est

14. Haec cum dixisset, conversa est retrorsum et videt Iesum stantem; et non sciebat quia Iesus est.

15. dicit ei Jesus mulier quid ploras quem quæris illa existimans quia hortulanus esset dicit ei domine si tu sustulisti eum dicito mihi ubi posuisti eum et ego eum tollam

15. Dicit ei Iesus: “Mulier, quid ploras? Quem quaeris?”. Illa, existimans quia hortulanus esset, dicit ei: “Domine, si tu sustulisti eum, dicito mihi, ubi posuisti eum, et ego eum tollam”.

16. dicit ei Jesus Maria conversa illa dicit ei rabboni quod dicitur magister

16. Dicit ei Iesus: “Maria!”. Conversa illa dicit ei Hebraice: “Rabbuni!” — quod dicitur Magister C.

17. dicit ei Jesus noli me tangere nondum enim ascendi ad Patrem meum vade autem ad fratres meos et dic eis ascendo ad Patrem meum et Patrem vestrum et Deum meum et Deum vestrum

17. Dicit ei Iesus: “Iam noli me tenere, nondum enim ascendi ad Patrem; vade autem ad fratres meos et dic eis: Ascendo ad Patrem meum et Patrem vestrum, et Deum meum et Deum vestrum”.

18. venit Maria Magdalene adnuntians discipulis quia vidi Dominum et hæc dixit mihi

18. Venit Maria Magdalene annuntians discipulis: “Vidi Dominum!”, et quia haec dixit ei.

19. cum esset ergo sero die illo una sabbatorum et fores essent clausæ ubi erant discipuli propter metum Judæorum venit Jesus et stetit in medio et dicit eis pax vobis

19. Cum esset ergo sero die illa prima sabbatorum, et fores essent clausae, ubi erant discipuli, propter metum Iudaeorum, venit Iesus et stetit in medio et dicit eis: “Pax vobis!”.

20. et hoc cum dixisset ostendit eis manus et latus gavisi sunt ergo discipuli viso Domino

20. Et hoc cum dixisset, ostendit eis manus et latus. Gavisi sunt ergo discipuli, viso Domino.

21. dixit ergo eis iterum pax vobis sicut misit me Pater et ego mitto vos

21. Dixit ergo eis iterum: “Pax vobis! Sicut misit me Pater, et ego mitto vos”.

22. hoc cum dixisset insuflavit et dicit eis accipite Spiritum Sanctum

22. Et cum hoc dixisset, insufflavit et dicit eis: “Accipite Spiritum Sanctum.

23. quorum remiseritis peccata remittuntur eis quorum retinueritis detenta sunt

23. Quorum remiseritis peccata, remissa sunt eis; quorum retinueritis, retenta sunt”.

24. Thomas autem unus ex duodecim qui dicitur Didymus non erat cum eis quando venit Jesus

24. Thomas autem, unus ex Duodecim, qui dicitur Didymus, non erat cum eis, quando venit Iesus.

25. dixerunt ergo ei alii discipuli vidimus Dominum ille autem dixit eis nisi videro in manibus ejus figuram clavorum et mittam digitum meum in locum clavorum et mittam manum meam in latus ejus non credam

25. Dicebant ergo ei alii discipuli: “Vidimus Dominum!”. Ille autem dixit eis: “Nisi videro in manibus eius signum clavorum et mittam digitum meum in signum clavorum et mittam manum meam in latus eius, non credam”.

26. et post dies octo iterum erant discipuli ejus intus et Thomas cum eis venit Jesus januis clausis et stetit in medio et dixit pax vobis

26. Et post dies octo iterum erant discipuli eius intus, et Thomas cum eis. Venit Iesus ianuis clausis et stetit in medio et dixit: “Pax vobis!”.

27. deinde dicit Thomæ infer digitum tuum huc et vide manus meas et adfer manum tuam et mitte in latus meum et noli esse incredulus sed fidelis

27. Deinde dicit Thomae: “Infer digitum tuum huc et vide manus meas et affer manum tuam et mitte in latus meum; et noli fieri incredulus sed fidelis!”.

28. respondit Thomas et dixit ei Dominus meus et Deus meus

28. Respondit Thomas et dixit ei: “Dominus meus et Deus meus!”.

29. dicit ei Jesus quia vidisti me credidisti beati qui non viderunt et crediderunt

29. Dicit ei Iesus: “Quia vidisti me, credidisti. Beati, qui non viderunt et crediderunt!”.

30. multa quidem et alia signa fecit Jesus in conspectu discipulorum suorum quæ non sunt scripta in libro hoc

30. Multa quidem et alia signa fecit Iesus in conspectu discipulorum suorum, quae non sunt scripta in libro hoc;

31. hæc autem scripta sunt ut credatis quia Jesus est Christus Filius Dei et ut credentes vitam habeatis in nomine ejus

31. haec autem scripta sunt, ut credatis quia Iesus est Christus Filius Dei et ut credentes vitam habeatis in nomine eius.