Epistula ad Hebraeos, 9
1. habuit quidem et prius justificationes culturæ et sanctum sæculare
2. tabernaculum enim factum est primum in quo inerant candelabra et mensa et propositio panum quæ dicitur sancta
3. post velamentum autem secundum tabernaculum quod dicitur sancta sanctorum
4. aureum habens turibulum et arcam testamenti circumtectam ex omni parte auro in qua urna aurea habens manna et virga Aaron quæ fronduerat et tabulæ testamenti
5. superque eam cherubin gloriæ obumbrantia propitiatorium de quibus non est modo dicendum per singula
6. his vero ita conpositis in priori quidem tabernaculo semper introibant sacerdotes sacrificiorum officia consummantes
7. in secundo autem semel in anno solus pontifex non sine sanguine quem offert pro sua et populi ignorantia
8. hoc significante Spiritu Sancto nondum propalatam esse sanctorum viam adhuc priore tabernaculo habente statum
9. quæ parabola est temporis instantis juxta quam munera et hostiæ offeruntur quæ non possunt juxta conscientiam perfectum facere servientem
10. solummodo in cibis et in potibus et variis baptismis et justitiis carnis usque ad tempus correctionis inpositis
11. Christus autem adsistens pontifex futurorum bonorum per amplius et perfectius tabernaculum non manufactum id est non hujus creationis
12. neque per sanguinem hircorum et vitulorum sed per proprium sanguinem introivit semel in sancta æterna redemptione inventa
13. si enim sanguis hircorum et taurorum et cinis vitulæ aspersus inquinatos sanctificat ad emundationem carnis
14. quanto magis sanguis Christi qui per Spiritum Sanctum semet ipsum obtulit inmaculatum Deo emundabit conscientiam vestram ab operibus mortuis ad serviendum Deo viventi
15. et ideo novi testamenti mediator est ut morte intercedente in redemptionem earum prævaricationum quæ erant sub priore testamento repromissionem accipiant qui vocati sunt æternæ hereditatis
16. ubi enim testamentum mors necesse est intercedat testatoris
17. testamentum enim in mortuis confirmatum est alioquin nondum valet dum vivit qui testatus est
18. unde ne primum quidem sine sanguine dedicatum est
19. lecto enim omni mandato legis a Mose universo populo accipiens sanguinem vitulorum et hircorum cum aqua et lana coccinea et hysopo ipsum quoque librum et omnem populum aspersit
20. dicens hic sanguis testamenti quod mandavit ad vos Deus
21. etiam tabernaculum et omnia vasa ministerii sanguine similiter aspersit
22. et omnia pæne in sanguine mundantur secundum legem et sine sanguinis fusione non fit remissio
23. necesse est ergo exemplaria quidem cælestium his mundari ipsa autem cælestia melioribus hostiis quam istis
24. non enim in manufactis sanctis Jesus introjit exemplaria verorum sed in ipsum cælum ut appareat nunc vultui Dei pro nobis
25. neque ut sæpe offerat semet ipsum quemadmodum pontifex intrat in sancta per singulos annos in sanguine alieno
26. alioquin oportebat eum frequenter pati ab origine mundi nunc autem semel in consummatione sæculorum ad destitutionem peccati per hostiam suam apparuit
27. et quemadmodum statutum est hominibus semel mori post hoc autem judicium
28. sic et Christus semel oblatus ad multorum exhaurienda peccata secundo sine peccato apparebit expectantibus se in salutem