Epistula I ad Corinthios, 14

1. sectamini caritatem æmulamini spiritalia magis autem ut prophetetis

1. Sectamini caritatem, aemu lamini spiritalia, magis au tem, ut prophetetis.

2. qui enim loquitur lingua non hominibus loquitur sed Deo nemo enim audit Spiritu autem loquitur mysteria

2. Qui enim loquitur lingua, non hominibus loquitur sed Deo; nemo enim audit, spiritu autem loquitur mysteria.

3. nam qui prophetat hominibus loquitur ædificationem et exhortationem et consolationes

3. Qui autem prophetat, hominibus loquitur aedificationem et exhortationem et consolationes.

4. qui loquitur lingua semet ipsum ædificat qui autem prophetat ecclesiam ædificat

4. Qui loquitur lingua, semetipsum aedificat; qui autem prophetat, ecclesiam aedificat.

5. volo autem omnes vos loqui linguis magis autem prophetare nam major est qui prophetat quam qui loquitur linguis nisi si forte ut interpretetur ut ecclesia ædificationem accipiat

5. Volo autem omnes vos loqui linguis, magis autem prophetare; maior autem est qui prophetat, quam qui loquitur linguis, nisi forte interpretetur, ut ecclesia aedificationem accipiat.

6. nunc autem fratres si venero ad vos linguis loquens quid vobis prodero nisi si vobis loquar aut in revelatione aut scientia aut prophetia aut in doctrina

6. Nunc autem, fratres, si venero ad vos linguis loquens, quid vobis prodero, nisi vobis loquar aut in revelatione aut in scientia aut in prophetia aut in doctrina?

7. tamen quæ sine anima sunt vocem dantia sive tibia sive cithara nisi distinctionem sonituum dederint quomodo scietur quod canitur aut quod citharizatur

7. Tamen, quae sine anima sunt vocem dantia, sive tibia sive cithara, nisi distinctionem sonituum dederint, quomodo scietur quod tibia canitur, aut quod citharizatur?

8. etenim si incertam vocem det tuba quis parabit se ad bellum

8. Etenim si incertam vocem det tuba, quis parabit se ad bellum?

9. ita et vos per linguam nisi manifestum sermonem dederitis quomodo scietur id quod dicitur eritis enim in æra loquentes

9. Ita et vos per linguam nisi manifestum sermonem dederitis, quomodo scietur id, quod dicitur? Eritis enim in aera loquentes.

10. tam multa ut puta genera linguarum sunt in mundo et nihil sine voce est

10. Tam multa, ut puta, genera linguarum sunt in mundo, et nihil sine voce est.

11. si ergo nesciero virtutem vocis ero ei cui loquor barbarus et qui loquitur mihi barbarus

11. Si ergo nesciero virtutem vocis, ero ei, qui loquitur, barbarus; et, qui loquitur, mihi barbarus.

12. sic et vos quoniam æmulatores estis spirituum ad ædificationem ecclesiæ quærite ut abundetis

12. Sic et vos, quoniam aemulatores estis spirituum, ad aedificationem ecclesiae quaerite, ut abundetis.

13. et ideo qui loquitur lingua oret ut interpretetur

13. Et ideo, qui loquitur lingua, oret, ut interpretetur.

14. nam si orem lingua spiritus meus orat mens autem mea sine fructu est

14. Nam si orem lingua, spiritus meus orat, mens autem mea sine fructu est.

15. quid ergo est orabo spiritu orabo et mente psallam spiritu psallam et mente

15. Quid ergo est? Orabo spiritu, orabo et mente; psallam spiritu, psallam et mente.

16. ceterum si benedixeris spiritu qui supplet locum idiotæ quomodo dicet amen super tuam benedictionem quoniam quid dicas nescit

16. Ceterum si benedixeris in spiritu, qui supplet locum idiotae, quomodo dicet “Amen!” super tuam benedictionem, quoniam quid dicas nescit?

17. nam tu quidem bene gratias agis sed alter non ædificatur

17. Nam tu quidem bene gratias agis, sed alter non aedificatur.

18. gratias ago Deo quod omnium vestrum lingua loquor

18. Gratias ago Deo, quod omnium vestrum magis linguis loquor;

19. sed in ecclesia volo quinque verba sensu meo loqui ut et alios instruam quam decem milia verborum in lingua

19. sed in ecclesia volo quinque verba sensu meo loqui, ut et alios instruam, quam decem milia verborum in lingua.

20. fratres nolite pueri effici sensibus sed malitia parvuli estote sensibus autem perfecti estote

20. Fratres, nolite pueri effici sensibus, sed malitia parvuli estote; sensibus autem perfecti estote.

21. in lege scriptum est quoniam in aliis linguis et labiis aliis loquar populo huic et nec sic exaudient me dicit Dominus

21. In lege scriptum est: “In aliis linguis et in labiis aliorum loquar populo huic, et nec sic exaudient me”, dicit Dominus.

22. itaque linguæ in signum sunt non fidelibus sed infidelibus prophetia autem non infidelibus sed fidelibus

22. Itaque linguae in signum sunt non fidelibus sed infidelibus, prophetia autem non infidelibus sed fidelibus.

23. si ergo conveniat universa ecclesia in unum et omnes linguis loquantur intrent autem idiotæ aut infideles nonne dicent quod insanitis

23. Si ergo conveniat universa ecclesia in unum, et omnes linguis loquantur, intrent autem idiotae aut infideles, nonne dicent quod insanitis?

24. si autem omnes prophetent intret autem quis infidelis vel idiota convincitur ab omnibus dijudicatur ab omnibus

24. Si autem omnes prophetent, intret autem quis infidelis vel idiota, convincitur ab omnibus, diiudicatur ab omnibus,

25. occulta cordis ejus manifesta fiunt et ita cadens in faciem adorabit Deum pronuntians quod vere Deus in vobis est

25. occulta cordis eius manifesta fiunt; et ita cadens in faciem adorabit Deum pronuntians: “Vere Deus in vobis est!”.

26. quid ergo est fratres cum convenitis unusquisque vestrum psalmum habet doctrinam habet apocalypsin habet linguam habet interpretationem habet omnia ad ædificationem fiant

26. Quid ergo est, fratres? Cum convenitis, unusquisque psalmum habet, doctrinam habet, apocalypsim habet, linguam habet, interpretationem habet: omnia ad aedificationem fiant.

27. sive lingua quis loquitur secundum duos aut ut multum tres et per partes et unus interpretetur

27. Sive lingua quis loquitur, secundum duos aut ut multum tres, et per partes, et unus interpretetur;

28. si autem non fuerit interpres taceat in ecclesia sibi autem loquatur et Deo

28. si autem non fuerit interpres, taceat in ecclesia, sibi autem loquatur et Deo.

29. prophetæ duo aut tres dicant et ceteri dijudicent

29. Prophetae duo aut tres dicant, et ceteri diiudicent;

30. quod si alii revelatum fuerit sedenti prior taceat

30. quod si alii revelatum fuerit sedenti, prior taceat.

31. potestis enim omnes per singulos prophetare ut omnes discant et omnes exhortentur

31. Potestis enim omnes per singulos prophetare, ut omnes discant, et omnes exhortentur;

32. et spiritus prophetarum prophetis subiecti sunt

32. et spiritus prophetarum prophetis subiecti sunt;

33. non enim est dissensionis Deus sed pacis sicut in omnibus ecclesiis sanctorum

33. non enim est dissensionis Deus sed pacis. Sicut in omnibus ecclesiis sanctorum,

34. mulieres in ecclesiis taceant non enim permittitur eis loqui sed subditas esse sicut et lex dicit

34. mulieres in ecclesiis taceant, non enim permittitur eis loqui; sed subditae sint, sicut et Lex dicit.

35. si quid autem volunt discere domi viros suos interrogent turpe est enim mulieri loqui in ecclesia

35. Si quid autem volunt discere, domi viros suos interrogent; turpe est enim mulieri loqui in ecclesia.

36. an a vobis verbum Dei processit aut in vos solos pervenit

36. An a vobis verbum Dei processit aut in vos solos pervenit?

37. si quis videtur propheta esse aut spiritalis cognoscat quæ scribo vobis quia Domini sunt mandata

37. Si quis videtur propheta esse aut spiritalis, cognoscat, quae scribo vobis, quia Domini est mandatum. 38 Si quis autem ignorat, ignorabitur.

38. si quis autem ignorat ignorabitur

38.

39. itaque fratres æmulamini prophetare et loqui linguis nolite prohibere

39. Itaque, fratres mei, aemulamini prophetare et loqui linguis nolite prohibere;

40. omnia autem honeste et secundum ordinem fiant

40. omnia autem honeste et secundum ordinem fiant.