Canticum Canticorum, 3

1. in lectulo meo per noctes quæsivi quem diligit anima mea quæsivi illum et non inveni

1. In lectulo meo per noctes quaesivi, quem diligit anima mea; quaesivi illum et non inveni.

2. surgam et circuibo civitatem per vicos et plateas quæram quem diligit anima mea quæsivi illum et non inveni

2. “Surgam et circuibo civitatem; per vicos et plateas quaeram, quem diligit anima mea”. Quaesivi illum et non inveni.

3. invenerunt me vigiles qui custodiunt civitatem num quem dilexit anima mea vidistis

3. Invenerunt me vigiles, qui circumeunt civitatem: “Num, quem diligit anima mea, vidistis?”.

4. paululum cum pertransissem eos inveni quem diligit anima mea tenui eum nec dimittam donec introducam illum in domum matris meæ et in cubiculum genetricis meæ

4. Paululum cum pertransissem eos, inveni, quem diligit anima mea; tenui eum nec dimittam, donec introducam illum in domum matris meae et in cubiculum genetricis meae.

5. adiuro vos filiæ Hierusalem per capreas cervosque camporum ne suscitetis neque evigilare faciatis dilectam donec ipsa velit

5. Adiuro vos, filiae Ierusalem, per capreas cervasque camporum, ne suscitetis neque evigilare faciatis dilectam, donec ipsa velit.

6. quæ est ista quæ ascendit per desertum sicut virgula fumi ex aromatibus murræ et turis et universi pulveris pigmentarii

6. Quid hoc, quod ascendit per desertum sicut virgula fumi, aromatizans tus et myrrham et universum pulverem pigmentarii?

7. en lectulum Salomonis sexaginta fortes ambiunt ex fortissimis Israël

7. En lectulum Salomonis. Sexaginta fortes ambiunt illum ex fortissimis Israel,

8. omnes tenentes gladios et ad bella doctissimi uniuscujusque ensis super femur suum propter timores nocturnos

8. omnes tenentes gladios et ad bella doctissimi, uniuscuiusque ensis super femur suum propter timores nocturnos.

9. ferculum fecit sibi rex Salomon de lignis Libani

9. Ferculum fecit sibi rex Salomon de lignis Libani;

10. columnas ejus fecit argenteas reclinatorium aureum ascensum purpureum media caritate constravit propter filias Hierusalem

10. columnas eius fecit argenteas, reclinatorium aureum, sedile purpureum: medium eius stratum ebeneum. Filiae Ierusalem,

11. egredimini et videte filiæ Sion regem Salomonem in diademate quo coronavit eum mater sua in die disponsionis illius et in die lætitiæ cordis ejus

11. egredimini et videte, filiae Sion, regem Salomonem in diademate, quo coronavit illum mater sua in die desponsationis illius et in die laetitiae cordis eius.