Liber Proverbiorum, 4
1. audite filii disciplinam patris et adtendite ut sciatis prudentiam
1. Audite, filii, disciplinam patris et attendite, ut sciatis prudentiam;
2. donum bonum tribuam vobis legem meam ne derelinquatis
2. quoniam doctrinam bonam tribuam vobis, legem meam ne derelinquatis.
3. nam et ego filius fui patris mei tenellus et unigenitus coram matre mea
3. Nam et ego filius fui patris mei, tenellus et unigenitus coram matre mea;
4. et docebat me atque dicebat suscipiat verba mea cor tuum custodi præcepta mea et vives
4. et docebat me atque dicebat: “Suscipiat verba mea cor tuum, custodi praecepta mea et vives.
5. posside sapientiam posside prudentiam ne obliviscaris neque declines a verbis oris mei
5. Posside sapientiam, posside prudentiam, ne obliviscaris neque declines a verbis oris mei.
6. ne dimittas eam et custodiet te dilige eam et servabit te
6. Ne dimittas eam, et custodiet te, dilige eam, et servabit te.
7. principium sapientiæ posside sapientiam et in omni possessione tua adquire prudentiam
7. Principium sapientiae: posside sapientiam et in omni possessione tua acquire prudentiam.
8. arripe illam et exaltabit te glorificaberis ab ea cum eam fueris amplexatus
8. Arripe illam, et exaltabit te, glorificaberis ab ea, cum eam fueris amplexatus.
9. dabit capiti tuo augmenta gratiarum et corona inclita proteget te
9. Dabit capiti tuo diadema gratiae, et corona inclita proteget te”.
10. audi fili mi et suscipe verba mea ut multiplicentur tibi anni vitæ
10. Audi, fili mi, et suscipe verba mea, ut multiplicentur tibi anni vitae.
11. viam sapientiæ monstravi tibi duxi te per semitas æquitatis
11. Viam sapientiae monstravi tibi; duxi te per semitas aequitatis,
12. quas cum ingressus fueris non artabuntur gressus tui et currens non habebis offendiculum
12. quas cum ingressus fueris, non arctabuntur gressus tui, et currens non habebis offendiculum.
13. tene disciplinam ne dimittas eam custodi illam quia ipsa est vita tua
13. Tene disciplinam nec laxes; custodi illam, quia ipsa est vita tua.
14. ne delecteris semitis impiorum nec tibi placeat malorum via
14. Ne ingrediaris in semitas impiorum nec procedas in malorum via.
15. fuge ab ea ne transeas per illam declina et desere eam
15. Fuge ab ea nec transeas per illam; declina et desere eam.
16. non enim dormiunt nisi malefecerint et rapitur somnus ab eis nisi subplantaverint
16. Non enim dormiunt, nisi malefecerint, et rapitur somnus ab eis, nisi supplantaverint.
17. comedunt panem impietatis et vinum iniquitatis bibunt
17. Comedunt enim panem impietatis et vinum iniquitatis bibunt.
18. justorum autem semita quasi lux splendens procedit et crescit usque ad perfectam diem
18. Iustorum autem semita quasi lux splendens procedit et crescit usque ad perfectam diem.
19. via impiorum tenebrosa nesciunt ubi corruant
19. Via impiorum tenebrosa; nesciunt, ubi corruant.
20. fili mi ausculta sermones meos et ad eloquia mea inclina aurem tuam
20. Fili mi, ausculta sermones meos et ad eloquia mea inclina aurem tuam;
21. ne recedant ab oculis tuis custodi ea in medio cordis tui
21. ne recedant ab oculis tuis, custodi ea in medio cordis tui:
22. vita enim sunt invenientibus ea et universæ carni sanitas
22. vita enim sunt invenientibus ea, et universae carni sanitas.
23. omni custodia serva cor tuum quia ex ipso vita procedit
23. Omni custodia serva cor tuum, quia ex ipso vita procedit.
24. remove a te os pravum et detrahentia labia sint procul a te
24. Remove a te os pravum, et detrahentia labia sint procul a te.
25. oculi tui recta videant et palpebræ tuæ præcedant gressus tuos
25. Oculi tui recta videant, et palpebrae tuae dirigantur coram te.
26. dirige semitam pedibus tuis et omnes viæ tuæ stabilientur
26. Observa semitam pedum tuorum, et omnes viae tuae stabilientur.
27. ne declines ad dexteram et ad sinistram averte pedem tuum a malo
27. Ne declines ad dexteram neque ad sinistram, averte pedem tuum a malo.
