Liber Leviticus, 27

1. locutusque est Dominus ad Mosen dicens

1. Locutusque est Dominus ad Moysen dicens:

2. loquere filiis Israël et dices ad eos homo qui votum fecerit et spoponderit Deo animam suam sub æstimatione dabit pretium

2. “Loquere fi liis Israel et dices ad eos: Homo, qui votum fecerit et spoponderit Deo animas, sub aestimatione dabit pretium:

3. si fuerit masculus a vicesimo usque ad sexagesimum annum dabit quinquaginta siclos argenti ad mensuram sanctuarii

3. si fuerit masculus a vicesimo usque ad sexagesimum annum, dabit quinquaginta siclos argenti ad mensuram sanctuarii;

4. si mulier triginta

4. si mulier, triginta.

5. a quinto autem anno usque ad vicesimum masculus dabit viginti siclos femina decem

5. A quinto autem anno usque ad vicesimum masculus dabit viginti siclos, femina decem;

6. ab uno mense usque ad annum quintum pro masculo dabuntur quinque sicli pro femina tres

6. ab uno mense usque ad annum quintum pro masculo dabuntur quinque sicli, pro femina tres;

7. sexagenarius et ultra masculus dabit quindecim siclos femina decem

7. sexagenarius et ultra masculus dabit quindecim siclos, femina decem.

8. si pauper fuerit et æstimationem reddere non valebit stabit coram sacerdote et quantum ille æstimaverit et viderit eum posse reddere tantum dabit

8. Si pauper fuerit et aestimationem reddere non valebit, sistet eum coram sacerdote, et quantum ille aestimaverit et viderit posse reddere, tantum dabit.

9. animal autem quod immolari potest Domino si quis voverit sanctum erit

9. Animal autem, quod immolari potest Domino, si quis voverit, sanctum erit

10. et mutari non poterit id est nec melius malo nec pejus bono quod si mutaverit et ipsum quod mutatum est et illud pro quo mutatum est consecratum erit Domino

10. et mutari non poterit, id est nec melius malo nec peius bono. Quod si mutaverit, et ipsum quod mutatum est et illud pro quo mutatum est, consecratum erit Domino.

11. animal inmundum quod immolari Domino non potest si quis voverit adducetur ante sacerdotem

11. Animal immundum, quod immolari Domino non potest, si quis voverit, adducetur ante sacerdotem,

12. qui dijudicans utrum bonum an malum sit statuet pretium

12. qui diiudicans utrum bonum an malum sit, sicut statuet pretium, sic erit.

13. quod si dare voluerit is qui offert addet supra æstimationis quintam partem

13. Quod si redimere illud voluerit is qui offert, addet supra aestimationem quintam partem.

14. homo si voverit domum suam et sanctificaverit Domino considerabit eam sacerdos utrum bona an mala sit et juxta pretium quod ab eo fuerit constitutum venundabitur

14. Homo si voverit domum suam et sanctificaverit Domino, considerabit eam sacerdos utrum bona an mala sit, et iuxta pretium, quod ab eo fuerit constitutum, stabit.

15. sin autem ille qui voverat voluerit redimere eam dabit quintam partem æstimationis supra et habebit domum

15. Sin autem ille, qui voverat, voluerit redimere eam, dabit quintam partem aestimationis supra et habebit domum.

16. quod si agrum possessionis suæ voverit et consecraverit Domino juxta mensuram sementis æstimabitur pretium si triginta modiis hordei seritur terra quinquaginta siclis veniet argenti

16. Quod si agrum possessionis suae voverit et consecraverit Domino, iuxta mensuram sementis aestimabitur pretium: si triginta homer hordei seritur terra, quinquaginta siclis aestimabitur argenti.

17. si statim ab anno incipientis jobelei voverit agrum quanto valere potest tanto æstimabitur

17. Si statim ab anno iobelei voverit agrum, quanto valere potest, tanto aestimabitur.

18. sin autem post aliquantum temporis supputabit sacerdos pecuniam juxta annorum qui reliqui sunt numerum usque ad jobeleum et detrahetur ex pretio

18. Sin autem post aliquantum temporis, supputabit ei sacerdos pecuniam iuxta annorum, qui reliqui sunt, numerum usque ad iobeleum, et detrahetur ex pretio.

19. quod si voluerit redimere agrum ille qui voverat addet quintam partem æstimatæ pecuniæ et possidebit eum

19. Quod si voluerit redimere agrum ille, qui voverat, addet quintam partem aestimatae pecuniae et possidebit eum.

20. sin autem noluerit redimere sed alteri cuilibet fuerit venundatus ultra eum qui voverat redimere non poterit

20. Sin autem noluerit redimere, sed alteri cuilibet vendiderit, ultra redimi non poterit;

21. quia cum jobelei venerit dies sanctificatus erit Domino et possessio consecrata ad jus pertinet sacerdotum

21. sed, cum iobelei venerit dies, sanctum erit Domino sicut ager anathematis; sacerdotis erit possessio eius.

22. si ager emptus et non de possessione majorum sanctificatus fuerit Domino

22. Quod si agrum emptum, qui non est de possessione maiorum, sanctificare voluerit Domino,

23. supputabit sacerdos juxta annorum numerum usque ad jobeleum pretium et dabit ille qui voverat eum Domino

23. supputabit ei sacerdos iuxta annorum numerum usque ad iobeleum pretium, quod dabit ille, qui voverat, in ipso die ut sanctum Domino.

24. in jobeleo autem revertetur ad priorem dominum qui vendiderat eum et habuerat in sortem possessionis suæ

24. In anno autem iobelei revertetur ager ad priorem dominum, qui vendiderat eum et habuerat in sortem possessionis suae.

25. omnis æstimatio siclo sanctuarii ponderabitur siclus viginti obolos habet

25. Omnis aestimatio siclo sanctuarii ponderabitur; siclus viginti gera habet.

26. primogenita quæ ad Dominum pertinent nemo sanctificare poterit et vovere sive bos sive ovis fuerit Domini sunt

26. Primogenita, quae de animalibus ad Dominum pertinent, nemo sanctificare poterit et vovere: sive bos sive ovis fuerit, Domini sunt.

27. quod si inmundum est animal redimet qui obtulit juxta æstimationem tuam et addet quintam partem pretii si redimere noluerit vendetur alteri quantocumque a te fuerit æstimatum

27. Quod si immundum est animal, redimet, qui obtulit, iuxta aestimationem et addet quintam partem pretii; si redimere noluerit, vendetur quanto fuerit.

28. omne quod Domino consecratur sive homo fuerit sive animal sive ager non veniet nec redimi poterit quicquid semel fuerit consecratum sanctum sanctorum erit Domino

28. Omne anathema, quod aliquis vir consecrat Domino de omni possessione sua, sive homo fuerit sive animal sive ager, non veniet nec redimi poterit; quidquid semel fuerit consecratum, sanctum sanctorum erit Domino.

29. et omnis consecratio quæ offertur ab homine non redimetur sed morte morietur

29. Et omnis homo, qui ut anathema offertur, non redimetur, sed morte morietur.

30. omnes decimæ terræ sive de frugibus sive de pomis arborum Domini sunt et illi sanctificantur

30. Omnes decimae terrae sive de frugibus sive de pomis arborum Domini sunt, sanctum Domino.

31. si quis autem voluerit redimere decimas suas addet quintam partem earum

31. Si quis autem voluerit redimere aliquid de decimis suis, addet quintam partem.

32. omnium decimarum boves et oves et capræ quæ sub pastoris virga transeunt quicquid decimum venerit sanctificabitur Domino

32. Omnes decimae boves et oves et caprae, quae sub pastoris virga transeunt, quidquid decimum venerit, erit sanctum Domino.

33. non eligetur nec bonum nec malum nec altero commutabitur si quis mutaverit et quod mutatum est et pro quo mutatum est sanctificabitur Domino et non redimetur

33. Non discernetur inter bonum et malum nec altero commutabitur; si quis mutaverit, et quod mutatum est et pro quo mutatum est, sanctum erit et non redimetur”.

34. hæc sunt præcepta quæ mandavit Dominus Mosi ad filios Israël in monte Sinai

34. Haec sunt praecepta, quae mandavit Dominus Moysi ad filios Israel in monte Sinai.