Liber Leviticus, 14

1. locutusque est Dominus ad Mosen dicens

1. Locutusque est Dominus ad Moysen dicens:

2. hic est ritus leprosi quando mundandus est adducetur ad sacerdotem

2. “Hic est ri tus leprosi, quando mundandus est: adducetur ad sacerdotem,

3. qui egressus e castris cum invenerit lepram esse mundatam

3. qui egressus e castris, cum invenerit lepram esse sanatam,

4. præcipiet ei qui purificatur ut offerat pro se duos passeres vivos quos vesci licitum est et lignum cedrinum vermiculumque et hysopum

4. praecipiet, ut sumant pro eo, qui purificatur, duas aves vivas, mundas et lignum cedrinum vermiculumque et hyssopum.

5. et unum e passeribus immolari jubebit in vase fictili super aquas viventes

5. Et unam ex avibus immolari iubebit in vase fictili super aquas viventes.

6. alium autem vivum cum ligno cedrino et cocco et hysopo tinguet in sanguine passeris immolati

6. Aliam autem vivam cum ligno cedrino et cocco et hyssopo tinguet in sanguine avis super aquas viventes immolatae,

7. quo asperget illum qui mundandus est septies ut jure purgetur et dimittet passerem vivum ut in agrum avolet

7. quo asperget illum, qui a lepra mundandus est, septies, ut iure purgetur; et dimittet avem vivam, ut in agrum avolet.

8. cumque laverit homo vestimenta sua radet omnes pilos corporis et lavabitur aqua purificatusque ingredietur castra ita dumtaxat ut maneat extra tabernaculum suum septem diebus

8. Cumque laverit homo vestimenta sua, radet omnes pilos corporis, et lavabitur aqua; purificatusque ingredietur castra, ita dumtaxat ut maneat extra tabernaculum suum septem diebus.

9. et die septimo radat capillos capitis barbamque et supercilia ac totius corporis pilos et lotis rursum vestibus et corpore

9. Et die septimo radet capillos capitis barbamque et supercilia ac totius corporis pilos et lavabit vestimenta carnemque suam aqua, et mundus erit.

10. die octavo adsumet duos agnos inmaculatos et ovem anniculam absque macula et tres decimas similæ in sacrificium quæ conspersa sit oleo et seorsum olei sextarium

10. Die octavo assumet duos agnos immaculatos et ovem anniculam absque macula et tres decimas ephi similae in sacrificium, quae conspersa sit oleo, et log olei.

11. cumque sacerdos purificans hominem statuerit eum et hæc omnia coram Domino in ostio tabernaculi testimonii

11. Cumque sacerdos purificans hominem statuerit eum et haec omnia coram Domino in ostio tabernaculi conventus,

12. tollet agnum et offeret eum pro delicto oleique sextarium et oblatis ante Dominum omnibus

12. tollet agnum unum et offeret eum in sacrificium pro delicto, oleique log et, elevatis ante Dominum omnibus,

13. immolabit agnum ubi immolari solet hostia pro peccato et holocaustum id est in loco sancto sicut enim pro peccato ita et pro delicto ad sacerdotem pertinet hostia sancta sanctorum est

13. immolabit agnum, ubi immolari solet hostia pro peccato et holocaustum, id est in loco sancto. Sicut enim pro peccato ita et pro delicto ad sacerdotem pertinet sacrificium: sanctum sanctorum est.

14. adsumensque sacerdos de sanguine hostiæ quæ immolata est pro delicto ponet super extremum auriculæ dextræ ejus qui mundatur et super pollices manus dextræ et pedis

14. Assumensque sacerdos de sanguine hostiae pro delicto ponet super extremum auriculae dextrae eius, qui mundatur, et super pollices manus dextrae et pedis;

15. et de olei sextario mittet in manum suam sinistram

15. et de olei log mittet in manum suam sinistram

16. tinguetque digitum dextrum in eo et asperget septies contra Dominum

16. tinguetque digitum dextrum in eo et asperget septies coram Domino.

17. quod autem reliquum est olei in leva manu fundet super extremum auriculæ dextræ ejus qui mundatur et super pollices manus ac pedis dextri et super sanguinem qui fusus est pro delicto

17. Quod autem reliquum est olei in laeva manu, fundet super extremum auriculae dextrae eius, qui mundatur, et super pollices manus ac pedis dextri et super sanguinem sacrificii pro delicto

18. et super caput ejus

18. et super caput eius, qui mundatur; expiabitque eum coram Domino

19. rogabitque pro eo coram Domino et faciet sacrificium pro peccato tunc immolabit holocaustum

19. et faciet sacrificium pro peccato. Tunc immolabit holocaustum

20. et ponet illud in altari cum libamentis suis et homo rite mundabitur

20. et ponet illud in altari cum sacrificio similae, et homo rite mundabitur.

21. quod si pauper est et non potest manus ejus invenire quæ dicta sunt adsumet agnum pro delicto ad oblationem ut roget pro eo sacerdos decimamque partem similæ conspersæ oleo in sacrificium et olei sextarium

21. Quod si pauper est, et non potest manus eius invenire, quae dicta sunt, assumet agnum pro delicto ad elationem, ut expiet eum sacerdos, decimamque partem similae conspersae oleo in sacrificium et olei log

22. duosque turtures sive duos pullos columbæ quorum sit unus pro peccato et alter in holocaustum

22. duosque turtures sive duos pullos columbae, quos manus eius invenire poterit, unum pro peccato et alterum in holocaustum.

23. offeretque ea die octavo purificationis suæ sacerdoti ad ostium tabernaculi testimonii coram Domino

23. Offeretque ea die octavo purificationis suae sacerdoti ad ostium tabernaculi conventus coram Domino.

24. qui suscipiens agnum pro delicto et sextarium olei levabit simul

24. Qui suscipiens agnum pro delicto et log olei levabit simul coram Domino;

25. immolatoque agno de sanguine ejus ponet super extremum auriculæ dextræ illius qui mundatur et super pollices manus ejus ac pedis dextri

25. immolatoque agno pro delicto, de sanguine eius ponet super extremum auriculae dextrae illius, qui mundatur, et super pollices manus eius ac pedis dextri;

26. olei vero partem mittet in manum suam sinistram

26. olei vero partem mittet in manum suam sinistram.

27. in quo tinguens digitum dextræ manus asperget septies contra Dominum

27. In quo tinguens digitum dextrae manus asperget septies coram Domino;

28. tangetque extremum dextræ auriculæ illius qui mundatur et pollices manus ac pedis dextri in loco sanguinis qui effusus est pro delicto

28. tangetque extremum auriculae dextrae illius, qui mundatur, et pollices manus ac pedis dextri super locum sanguinis, qui effusus est pro delicto.

29. reliquam autem partem olei quæ est in sinistra manu mittet super caput purificati ut placet pro eo Dominum

29. Reliquam autem partem olei, quae est in sinistra manu, mittet super caput hominis, qui purificatur, in expiationem eius coram Domino;

30. et turturem sive pullum columbæ offeret

30. et turtures sive pullos columbae, quos manus illius invenerit, offeret,

31. unum pro delicto et alterum in holocaustum cum libamentis suis

31. unum pro delicto et alterum in holocaustum cum sacrificio similae, et sic expiabit eum sacerdos coram Domino.

32. hoc est sacrificium leprosi qui habere non potest omnia in emundationem sui

32. Hoc est sacrificium leprosi, qui habere non potest omnia in emundationem sui”.

33. locutus est Dominus ad Mosen et Aaron dicens

33. Locutus est Dominus ad Moysen et Aaron dicens:

34. cum ingressi fueritis terram Chanaan quam ego dabo vobis in possessionem si fuerit plaga lepræ in ædibus

34. “Cum ingressi fueritis terram Chanaan, quam ego dabo vobis in possessionem, si fuerit plaga leprae in aedibus terrae possessionis vestrae,

35. ibit cujus est domus nuntians sacerdoti et dicet quasi plaga lepræ videtur mihi esse in domo mea

35. ibit, cuius est domus, nuntians sacerdoti et dicet: "Quasi plaga videtur mihi esse in domo mea".

36. at ille præcipiet ut efferant universa de domo priusquam ingrediatur eam et videat utrum lepra sit ne inmunda fiant omnia quæ in domo sunt intrabitque postea ut consideret domus lepram

36. At ille praecipiet, ut efferant universa de domo, priusquam ingrediatur eam, et videat plagam, ne immunda fiant omnia, quae in domo sunt. Intrabitque postea, ut consideret domum;

37. et cum viderit in parietibus illius quasi valliculas pallore sive rubore deformes et humiliores superficie reliqua

37. et, cum viderit in parietibus illius quasi valliculas pallore sive rubore deformes et humiliores superficie reliqua,

38. egredietur ostium domus et statim claudet eam septem diebus

38. egredietur ostium domus et statim claudet eam septem diebus.

39. reversusque die septimo considerabit eam si invenerit crevisse lepram

39. Reversusque die septimo considerabit eam; si invenerit crevisse plagam,

40. jubebit erui lapides in quibus lepra est et proici eos extra civitatem in loco inmundo

40. iubebit erui lapides, in quibus plaga est, et proici eos extra civitatem in loco immundo;

41. domum autem ipsam radi intrinsecus per circuitum et spargi pulverem rasuræ extra urbem in loco inmundo

41. domum autem ipsam radi intrinsecus per circuitum et spargi pulverem rasurae extra urbem in locum immundum

42. lapidesque alios reponi pro his qui ablati fuerint et luto alio liniri domum

42. lapidesque alios reponi pro his, qui ablati fuerint, et luto alio liniri domum.

43. sin autem postquam eruti sunt lapides et pulvis elatus et alia terra lita

43. Sin autem plaga rursum effloruerit in domo, postquam eruti sunt lapides et pulvis erasus et alia terra lita,

44. ingressus sacerdos viderit reversam lepram et parietes aspersos maculis lepra est perseverans et inmunda domus

44. et ingressus sacerdos viderit crevisse plagam in domo: lepra est maligna et domus immunda.

45. quam statim destruent et lapides ejus ac ligna atque universum pulverem proicient extra oppidum in loco inmundo

45. Quam statim destruent et lapides eius ac ligna atque universum pulverem domus proicient extra oppidum in loco immundo.

46. qui intraverit domum quando clausa est inmundus erit usque ad vesperum

46. Qui intraverit domum, quando clausa est, immundus erit usque ad vesperum;

47. et qui dormierit in ea et comederit quippiam lavabit vestimenta sua

47. et, qui dormierit in ea vel comederit quippiam, lavabit vestimenta sua.

48. quod si introjens sacerdos viderit lepram non crevisse in domo postquam denuo lita est purificabit eam reddita sanitate

48. Quod si introiens sacerdos viderit plagam non crevisse in domo, postquam denuo lita est, mundam eam esse decernet, reddita sanitate.

49. et in purificationem ejus sumet duos passeres lignumque cedrinum et vermiculum atque hysopum

49. Et in purificationem eius sumet duas aves lignumque cedrinum et vermiculum atque hyssopum

50. et immolato uno passere in vase fictili super aquas vivas

50. et, immolata una avi in vase fictili super aquas vivas,

51. tollet lignum cedrinum et hysopum et coccum et passerem vivum et intinguet omnia in sanguine passeris immolati atque in aquis viventibus et asperget domum septies

51. tollet lignum cedrinum et hyssopum et coccum et avem vivam et intinguet omnia in sanguine avis immolatae atque in aquis viventibus et asperget domum septies;

52. purificabitque eam tam in sanguine passeris quam in aquis viventibus et in passere vivo lignoque cedrino et hysopo atque vermiculo

52. purificabitque eam tam in sanguine avis quam in aquis viventibus et in avi viva lignoque cedrino et hyssopo atque vermiculo;

53. cumque dimiserit passerem avolare in agrum libere orabit pro domo et jure mundabitur

53. cumque dimiserit avem avolare extra urbem in agrum libere, expiabit domum, et erit munda.

54. ista est lex omnis lepræ et percussuræ

54. Ista est lex omnis leprae et scabiei,

55. lepræ vestium et domorum

55. leprae vestium et domorum,

56. cicatricis et erumpentium papularum lucentis maculæ et in varias species coloribus inmutatis

56. tumoris et pustulae et lucentis maculae,

57. ut possit sciri quo tempore mundum quid vel inmundum sit

57. ut possit sciri quo tempore immundum quid vel mundum sit”.