Epistula I Petri, 4
1. Christo igitur passo in carne et vos eadem cogitatione armamini quia qui passus est carne desiit a peccatis
1. Christo igitur passo in carne, et vos eadem cogitatione armami ni, quia, qui passus est carne, desiit a peccato;
2. ut jam non hominum desideriis sed voluntate Dei quod reliquum est in carne vivat temporis
2. ut iam non hominum concupiscentiis sed voluntate Dei, quod reliquum est in carne vivat temporis.
3. sufficit enim præteritum tempus ad voluntatem gentium consummandam qui ambulaverunt in luxuriis desideriis vinolentiis comesationibus potationibus et inlicitis idolorum cultibus
3. Sufficit enim praeteritum tempus ad voluntatem gentium consummandam, vobis, qui ambulastis in luxuriis, concupiscentiis, vinolentiis, comissationibus, potationibus et illicitis idolorum cultibus.
4. in quo peregrinantur non concurrentibus vobis in eandem luxuriæ confusionem blasphemantes
4. In quo mirantur non concurrentibus vobis in eandem luxuriae effusionem, blasphemantes;
5. qui reddent rationem ei qui paratus est judicare vivos et mortuos
5. qui reddent rationem ei, qui paratus est iudicare vivos et mortuos.
6. propter hoc enim et mortuis evangelizatum est ut judicentur quidem secundum homines in carne vivant autem secundum Deum spiritu
6. Propter hoc enim et mortuis evangelizatum est, ut iudicentur quidem secundum homines carne, vivant autem secundum Deum Spiritu.
7. omnium autem finis adpropinquavit estote itaque prudentes et vigilate in orationibus
7. Omnium autem finis appropinquavit. Estote itaque prudentes et vigilate in orationibus.
8. ante omnia mutuam in vosmet ipsos caritatem continuam habentes quia caritas operit multitudinem peccatorum
8. Ante omnia mutuam in vosmetipsos caritatem continuam habentes, quia caritas operit multitudinem peccatorum;
9. hospitales invicem sine murmuratione
9. hospitales invicem sine murmuratione;
10. unusquisque sicut accepit gratiam in alterutrum illam administrantes sicut boni dispensatores multiformis gratiæ Dei
10. unusquisque, sicut accepit donationem, in alterutrum illam administrantes, sicut boni dispensatores multiformis gratiae Dei.
11. si quis loquitur quasi sermones Dei si quis ministrat tamquam ex virtute quam administrat Deus ut in omnibus honorificetur Deus per Jesum Christum cui est gloria et imperium in sæcula sæculorum amen
11. Si quis loquitur, quasi sermones Dei; si quis ministrat, tamquam ex virtute, quam largitur Deus, ut in omnibus glorificetur Deus per Iesum Christum: cui est gloria et imperium in saecula saeculorum. Amen.
12. carissimi nolite peregrinari in fervore qui ad temptationem vobis fit quasi novi aliquid vobis contingat
12. Carissimi, nolite mirari in fervore, qui ad tentationem vobis fit, quasi novi aliquid vobis contingat,
13. sed communicantes Christi passionibus gaudete ut et in revelatione gloriæ ejus gaudeatis exultantes
13. sed, quemadmodum communicatis Christi passionibus, gaudete, ut et in revelatione gloriae eius gaudeatis exsultantes.
14. si exprobramini in nomine Christi beati quoniam gloriæ Dei Spiritus in vobis requiescit
14. Si exprobramini in nomine Christi, beati, quoniam Spiritus gloriae et Dei super vos requiescit.
15. nemo enim vestrum patiatur quasi homicida aut fur aut maledicus aut alienorum appetitor
15. Nemo enim vestrum patiatur quasi homicida aut fur aut maleficus aut alienorum speculator;
16. si autem ut Christianus non erubescat glorificet autem Deum in isto nomine
16. si autem ut christianus, non erubescat, glorificet autem Deum in isto nomine.
17. quoniam tempus ut incipiat judicium de domo Dei si autem primum a nobis qui finis eorum qui non credunt Dei evangelio
17. Quoniam tempus est, ut incipiat iudicium a domo Dei; si autem primum a nobis, qui finis eorum, qui non credunt Dei evangelio?
18. et si justus vix salvatur impius et peccator ubi parebit
18. “Et si iustus vix salvatur, impius et peccator ubi parebit?”.
19. itaque et hii qui patiuntur secundum voluntatem Dei fideli creatori commendant animas suas in benefactis
19. Itaque et hi, qui patiuntur secundum voluntatem Dei, fideli Creatori commendent animas suas in benefacto.
