Liber Numeri, 1

1. locutusque est Dominus ad Mosen in deserto Sinai in tabernaculo fœderis prima die mensis secundi anno altero egressionis eorum ex Ægypto dicens

1. Locutusque est Dominus ad Moysen in deserto Sinai in ta bernaculo conventus, prima die mensis secundi, anno altero egressionis eorum ex Aegypto, dicens:

2. tollite summam universæ congregationis filiorum Israël per cognationes et domos suas et nomina singulorum quicquid sexus est masculini

2. “Tollite summam universae congregationis filiorum Israel per cognationes et domos suas et nomina singulorum, quidquid sexus est masculini

3. a vicesimo anno et supra omnium virorum fortium ex Israël et numerabitis eos per turmas suas tu et Aaron

3. a vicesimo anno et supra omnium ex Israel, qui possunt ad bella procedere, et numerabitis eos per turmas suas, tu et Aaron.

4. eruntque vobiscum principes tribuum ac domorum in cognationibus suis

4. Eritque vobiscum vir per tribum, princeps domus patrum suorum,

5. quorum ista sunt nomina de Ruben Elisur filius Sedeur

5. quorum ista sunt nomina: de Ruben Elisur filius Sedeur;

6. de Symeon Salamihel filius Surisaddai

6. de Simeon Salamiel filius Surisaddai;

7. de Juda Naasson filius Aminadab

7. de Iuda Naasson filius Aminadab;

8. de Isachar Nathanaël filius Suar

8. de Issachar Nathanael filius Suar;

9. de Zabulon Heliab filius Helon

9. de Zabulon Eliab filius Helon.

10. filiorum autem Joseph de Ephraim Helisama filius Ammiud de Manasse Gamalihel filius Phadassur

10. Filiorum autem Ioseph: de Ephraim Elisama filius Ammiud; de Manasse Gamaliel filius Phadassur.

11. de Beniamin Abidan filius Gedeonis

11. De Beniamin Abidan filius Gedeonis;

12. de Dan Ahiezer filius Amisaddai

12. de Dan Ahiezer filius Ammisaddai;

13. de Aser Phegihel filius Ochran

13. de Aser Phegiel filius Ochran;

14. de Gad Heliasaph filius Duhel

14. de Gad Eliasaph filius Deuel;

15. de Nepthali Ahira filius Henan

15. de Nephthali Ahira filius Enan”.

16. hii nobilissimi principes multitudinis per tribus et cognationes suas et capita exercitus Israël

16. Hi viri nobilissimi congregationis principes tribuum patrum suorum et capita milium Israel.

17. quos tulerunt Moses et Aaron cum omni vulgi multitudine

17. Quos tulerunt Moyses et Aaron nominatim designatos

18. et congregaverunt primo die mensis secundi recensentes eos per cognationes et domos ac familias et capita et nomina singulorum a vicesimo anno et supra

18. et omnem congregationem congregaverunt primo die mensis secundi recensentes eos per cognationes et domos patrum eorum, per nomina singulorum a vicesimo anno et supra per capita,

19. sicut præceperat Dominus Mosi numeratique sunt in deserto Sinai

19. sicut praeceperat Dominus Moysi. Numeratique sunt in deserto Sinai.

20. de Ruben primogenito Israhelis per generationes et familias ac domos suas et nomina capitum singulorum omne quod sexus est masculini a vicesimo anno et supra procedentium ad bellum

20. De Ruben primogenito Israelis generationes per familias ac domos patrum suorum, per nomina capitum singulorum omne quod sexus est masculini a vicesimo anno et supra procedentium ad bellum.

21. quadraginta sex milia quingenti

21. Recensiti tribus Ruben quadraginta sex milia quingenti.

22. de filiis Symeon per generationes et familias ac domos cognationum suarum recensiti sunt per nomina et capita singulorum omne quod sexus est masculini a vicesimo anno et supra procedentium ad bellum

22. De filiis Simeon generationes per familias ac domos cognationum suarum recensiti sunt per nomina et capita singulorum omne quod sexus est masculini a vicesimo anno et supra procedentium ad bellum.

23. quinquaginta novem milia trecenti

23. Recensiti tribus Simeon quinquaginta novem milia trecenti.

24. de filiis Gad per generationes et familias ac domos cognationum suarum recensiti sunt per nomina singulorum a viginti annis et supra omnes qui ad bella procederent

24. De filiis Gad generationes per familias ac domos cognationum suarum recensiti sunt per nomina singulorum a viginti annis et supra omnes, qui ad bella procederent,

25. quadraginta quinque milia sescenti quinquaginta

25. quadraginta quinque milia sescenti quinquaginta.

26. de filiis Juda per generationes et familias ac domos cognationum suarum per nomina singulorum a vicesimo anno et supra omnes qui poterant ad bella procedere

26. De filiis Iudae generationes per familias ac domos cognationum suarum per nomina singulorum a vicesimo anno et supra omnes, qui poterant ad bella procedere,

27. recensiti sunt septuaginta quattuor milia sescenti

27. recensiti sunt septuaginta quattuor milia sescenti.

28. de filiis Isachar per generationes et familias ac domos cognationum suarum per nomina singulorum a vicesimo anno et supra omnes qui ad bella procederent

28. De filiis Issachar generationes per familias ac domos cognationum suarum per nomina singulorum a vicesimo anno et supra omnes, qui ad bella procederent,

29. recensiti sunt quinquaginta quattuor milia quadringenti

29. recensiti sunt quinquaginta quattuor milia quadringenti.

30. de filiis Zabulon per generationes et familias ac domos cognationum suarum recensiti sunt per nomina singulorum a vicesimo anno et supra omnes qui poterant ad bella procedere

30. De filiis Zabulon generationes per familias ac domos cognationum suarum recensiti sunt per nomina singulorum a vicesimo anno et supra omnes, qui poterant ad bella procedere,

31. quinquaginta septem milia quadringenti

31. quinquaginta septem milia quadringenti.

32. de filiis Joseph filiorum Ephraim per generationes et familias ac domos cognationum suarum recensiti sunt per nomina singulorum a vicesimo anno et supra omnes qui poterant ad bella procedere

32. De filiis Ioseph filiorum Ephraim generationes per familias ac domos cognationum suarum recensiti sunt per nomina singulorum a vicesimo anno et supra omnes, qui poterant ad bella procedere,

33. quadraginta milia quingenti

33. quadraginta milia quingenti.

34. porro filiorum Manasse per generationes et familias ac domos cognationum suarum recensiti sunt per nomina singulorum a viginti annis et supra omnes qui poterant ad bella procedere

34. Porro filiorum Manasse generationes per familias ac domos cognationum suarum recensiti sunt per nomina singulorum a viginti annis et supra omnes, qui poterant ad bella procedere,

35. triginta duo milia ducenti

35. triginta duo milia ducenti.

36. de filiis Beniamin per generationes et familias ac domos cognationum suarum recensiti sunt nominibus singulorum a vicesimo anno et supra omnes qui poterant ad bella procedere

36. De filiis Beniamin generationes per familias ac domos cognationum suarum recensiti sunt nominibus singulorum a vicesimo anno et supra omnes, qui poterant ad bella procedere,

37. triginta quinque milia quadringenti

37. triginta quinque milia quadringenti.

38. de filiis Dan per generationes et familias ac domos cognationum suarum recensiti sunt nominibus singulorum a vicesimo anno et supra omnes qui poterant ad bella procedere

38. De filiis Dan generationes per familias ac domos cognationum suarum recensiti sunt nominibus singulorum a vicesimo anno et supra omnes, qui poterant ad bella procedere,

39. sexaginta duo milia septingenti

39. sexaginta duo milia septingenti.

40. de filiis Aser per generationes et familias ac domos cognationum suarum recensiti sunt per nomina singulorum a vicesimo anno et supra omnes qui poterant ad bella procedere

40. De filiis Aser generationes per familias ac domos cognationum suarum recensiti sunt per nomina singulorum a vicesimo anno et supra omnes, qui poterant ad bella procedere,

41. quadraginta milia et mille quingenti

41. quadraginta milia et mille quingenti.

42. de filiis Nepthali per generationes et familias ac domos cognationum suarum recensiti sunt nominibus singulorum a vicesimo anno et supra omnes qui poterant ad bella procedere

42. De filiis Nephthali generationes per familias ac domos cognationum suarum recensiti sunt nominibus singulorum a vicesimo anno et supra omnes, qui poterant ad bella procedere,

43. quinquaginta tria milia quadringenti

43. quinquaginta tria milia quadringenti.

44. hii sunt quos numeraverunt Moses et Aaron et duodecim principes Israël singulos per domos cognationum suarum

44. Hi sunt quos numeraverunt Moyses et Aaron et duodecim principes Israel, singuli per domos patrum suorum.

45. fueruntque omnes filiorum Israël per domos et familias suas a vicesimo anno et supra qui poterant ad bella procedere

45. Fueruntque omnis numerus filiorum Israel per domos patrum suorum a vicesimo anno et supra, qui poterant ad bella procedere, 46 sescenta tria milia virorum quingenti quinquaginta.

46. sescenta tria milia virorum quingenti quinquaginta

46.

47. Levitæ autem in tribu familiarum suarum non sunt numerati cum eis

47. Levitae autem in tribu patrum suorum non sunt numerati cum eis.

48. locutusque est Dominus ad Mosen dicens

48. Locutusque est Dominus ad Moysen dicens:

49. tribum Levi noli numerare neque ponas summam eorum cum filiis Israël

49. “Tribum Levi noli numerare neque pones summam eorum cum filiis Israel,

50. sed constitue eos super tabernaculum testimonii cuncta vasa ejus et quicquid ad cærimonias pertinet ipsi portabunt tabernaculum et omnia utensilia ejus et erunt in ministerio ac per gyrum tabernaculi metabuntur

50. sed constitue eos super habitaculum testimonii et cuncta vasa eius et quidquid ad caeremonias pertinet. Ipsi portabunt habitaculum et omnia utensilia eius et erunt in ministerio ac per gyrum habitaculi metabuntur.

51. cum proficiscendum fuerit deponent Levitæ tabernaculum cum castra metanda erigent quisquis externorum accesserit occidetur

51. Cum proficiscendum fuerit, deponent Levitae habitaculum; cum castrametandum, erigent; quisquis externorum accesserit, occidetur.

52. metabuntur autem castra filii Israël unusquisque per turmas et cuneos atque exercitum suum

52. Metabuntur autem castra filii Israel, unusquisque per turmas et cuneos atque exercitum suum.

53. porro Levitæ per gyrum tabernaculi figent tentoria ne fiat indignatio super multitudinem filiorum Israël et excubabunt in custodiis tabernaculi testimonii

53. Porro Levitae per gyrum habitaculi testimonii figent tentoria, ne fiat indignatio super congregationem filiorum Israel, et excubabunt in custodiis habitaculi testimonii”.

54. fecerunt ergo filii Israël juxta omnia quæ præceperat Dominus Mosi

54. Fecerunt ergo filii Israel iuxta omnia, quae praeceperat Dominus Moysi.