Liber I Paralipomenon, 12
1. hii quoque venerunt ad David in Siceleg cum adhuc fugeret Saul filium Cis qui erant fortissimi et egregii pugnatores
2. tendentes arcum et utraque manu fundis saxa jacientes et dirigentes sagittas de fratribus Saul ex Beniamin
3. princeps Ahiezer et Joas filii Sammaa Gabathites et Jazihel et Phallet filii Azmoth et Baracha et Jeu Anathothites
4. Samajas quoque Gabaonites fortissimus inter triginta et super triginta Hieremias et Jezihel et Johanan et Jezbad Gaderothites
5. Eluzai et Jerimuth et Baalia et Samaria et Saphatia Aruphites
6. Helcana et Jesia et Azraël et Jœzer et Jesbaam de Careim
7. Jœela quoque et Zabadia filii Jeroam de Gedor
8. sed et de Gaddi transfugerunt ad David cum lateret in deserto viri robustissimi et pugnatores optimi tenentes clypeum et hastam facies eorum quasi facies leonis et veloces quasi capreæ in montibus
9. Ezer princeps Obdias secundus Eliab tertius
10. Masmana quartus Hieremias quintus
11. Hetthi sextus Helihel septimus
12. Johanan octavus Helzebad nonus
13. Hieremias decimus Bachannai undecimus
14. hii de filiis Gad principes exercitus novissimus centum militibus præerat et maximus mille
15. isti sunt qui transierunt Jordanem mense primo quando inundare consuevit super ripas suas et omnes fugaverunt qui morabantur in vallibus ad orientalem plagam et occidentalem
16. venerunt autem et de Beniamin et de Juda ad præsidium in quo morabatur David
17. egressusque est David obviam eis et ait si pacifice venistis ad me ut auxiliemini mihi cor meum jungatur vobis si autem insidiamini mihi pro adversariis meis cum ego iniquitatem in manibus non habeam videat Deus patrum nostrorum et judicet
18. spiritus vero induit Amessai principem inter triginta et ait tui sumus o David et tecum fili Isai pax pax tibi et pax adiutoribus tuis te enim adiuvat Deus tuus suscepit ergo eos David et constituit principes turmæ
19. porro de Manasse transfugerunt ad David quando veniebat cum Philisthim adversum Saul ut pugnaret et non dimicavit cum eis quia inito consilio remiserunt eum principes Philisthinorum dicentes periculo capitis nostri revertetur ad dominum suum Saul
20. quando igitur reversus est in Siceleg transfugerunt ad eum de Manasse Ednas et Jozabad et Jedihel et Michaël et Jozabad et Heliu et Salathi principes milium in Manasse
21. hii præbuerunt auxilium David adversum latrunculos omnes enim erant viri fortissimi et facti sunt principes in exercitu
22. sed et per singulos dies veniebant ad David ad auxiliandum ei usque dum fieret grandis numerus quasi exercitus Dei
23. iste quoque est numerus principum exercitus qui venerunt ad David cum esset in Hebron ut transferrent regnum Saul ad eum juxta verbum Domini
24. filii Juda portantes clypeum et hastam sex milia octingenti expediti ad prœlium
25. de filiis Symeon virorum fortissimorum ad pugnandum septem milia centum
26. de filiis Levi quattuor milia sescenti
27. Jojada quoque princeps de stirpe Aaron et cum eo tria milia septingenti
28. Sadoc etiam puer egregiæ indolis et domus patris ejus principes viginti duo
29. de filiis autem Beniamin fratribus Saul tria milia magna enim pars eorum adhuc sequebatur domum Saul
30. porro de filiis Ephraim viginti milia octingenti fortissimi robore viri nominati in cognationibus suis
31. et ex dimidia parte tribus Manasse decem et octo milia singuli per nomina sua venerunt ut constituerent regem David
32. de filiis quoque Isachar viri eruditi qui norant singula tempora ad præcipiendum quid facere deberet Israël principes ducenti omnis autem reliqua tribus eorum consilium sequebatur
33. porro de Zabulon qui egrediebantur ad prœlium et stabant in acie instructi armis bellicis quinquaginta milia venerunt in auxilium non in corde duplici
34. et de Nepthali principes mille et cum eis instructa clypeo et hasta triginta septem milia
35. de Dan etiam præparata ad prœlium viginti octo milia sescentorum
36. et de Aser egredientes ad pugnam et in acie provocantes quadraginta milia
37. trans Jordanem autem de filiis Ruben et Gad et dimidia parte tribus Manasse instructa armis bellicis centum viginti milia
38. omnes isti viri bellatores et expediti ad pugnandum corde perfecto venerunt in Hebron ut constituerent regem David super universum Israël sed et omnes reliqui ex Israël uno corde erant ut rex fieret David
39. fueruntque ibi apud David tribus diebus comedentes et bibentes præparaverunt enim eis fratres sui
40. sed et qui juxta eos erant usque ad Isachar et Zabulon et Nepthalim adferebant panes in asinis et camelis et mulis et bubus ad vescendum farinam palatas uvam passam vinum oleum boves arietes ad omnem copiam gaudium quippe erat in Israël