Prophetia Amos, 8
1. hæc ostendit mihi Dominus Deus et ecce uncinus pomorum
1. Haec ostendit mihi Dominus Deus: et ecce canistrum pomorum.
2. et dixit quid tu vides Amos et dixi uncinum pomorum et dixit Dominus ad me venit finis super populum meum Israël non adiciam ultra ut pertranseam eum
2. Et dixit: “Quid tu vides, Amos?”. Et dixi: “Canistrum pomorum”. Et dixit Dominus ad me: “Venit finis super populum meum Israel; non adiciam ultra ignoscere ei.
3. et stridebunt cardines templi in die illa dicit Dominus Deus multi morientur in omni loco proicietur silentium
3. Et lugent cantatrices palatii in die illa, dicit Dominus Deus; multa erunt cadavera, in omni loco proicientur: silentium.
4. audite hoc qui conteritis pauperem et deficere facitis egenos terræ
4. Audite hoc, qui conteritis pauperem et deficere facitis egenos terrae,
5. dicentes quando transibit mensis et venundabimus merces et sabbatum et aperiemus frumentum ut inminuamus mensuram et augeamus siclum et subponamus stateras dolosas
5. dicentes: “Quando transibit neomenia, et venumdabimus merces? Et sabbatum, et aperiemus frumentum, ut imminuamus mensuram et augeamus siclum et supponamus stateras dolosas,
6. ut possideamus in argento egenos et pauperes pro calciamentis et quisquilias frumenti vendamus
6. ut possideamus in argento egenos et pauperem pro calceamentis et quisquilias frumenti vendamus?””.
7. juravit Dominus in superbia Jacob si oblitus fuero usque ad finem omnia opera eorum
7. Iuravit Dominus in superbia Iacob: “Non obliviscar in perpetuum omnia opera eorum.
8. numquid super isto non commovebitur terra et lugebit omnis habitator ejus et ascendet quasi fluvius universus et eicietur et defluet quasi rivus Ægypti
8. Numquid super isto non commovebitur terra, et lugebit omnis habitator eius, et ascendet quasi fluvius universa, fervebit et decrescet quasi flumen Aegypti?
9. et erit in die illa dicit Dominus occidet sol meridie et tenebrescere faciam terram in die luminis
9. Et erit: in die illa, dicit Dominus Deus, occidere faciam solem in meridie et tenebrescere faciam terram in die luminis
10. et convertam festivitates vestras in luctum et omnia cantica vestra in planctum et inducam super omne dorsum vestrum saccum et super omne caput calvitium et ponam eam quasi luctum unigeniti et novissima ejus quasi diem amarum
10. et convertam festivitates vestras in luctum et omnia cantica vestra in planctum; et inducam super omnes lumbos saccum et super omne caput calvitium; et ponam eam quasi luctum unigeniti et novissima eius quasi diem amarum.
11. ecce dies veniunt dicit Dominus et mittam famem in terram non famem panis neque sitim aquæ sed audiendi verbum Domini
11. Ecce dies veniunt, dicit Dominus, et mittam famem in terram; non famem panis neque sitim aquae, sed audiendi verbum Domini”.
12. et commovebuntur a mari usque ad mare et ab aquilone usque ad orientem circumibunt quærentes verbum Domini et non invenient
12. Et fugient a mari usque ad mare; et ab aquilone usque ad orientem circuibunt, quaerentes verbum Domini, et non invenient.
13. in die illa deficient virgines pulchræ et adulescentes in siti
13. In die illa deficient virgines pulchrae et adulescentes in siti.
14. qui jurant in delicto Samariæ et dicunt vivit deus tuus Dan et vivit via Bersabee et cadent et non resurgent ultra
14. Qui iurant in delicto Samariae et dicunt: “Vivit Deus tuus, Dan!” et “Vivit via, Bersabee!”, et cadent et non resurgent ultra.
