Liber Iob, 28
1. habet argentum venarum suarum principia et auro locus est in quo conflatur
2. ferrum de terra tollitur et lapis solutus calore in æs vertitur
3. tempus posuit tenebris et universorum finem ipse considerat lapidem quoque caliginis et umbram mortis
4. dividit torrens a populo peregrinante eos quos oblitus est pes egentis hominum et invios
5. terra de qua oriebatur panis in loco suo igne subversa est
6. locus sapphyri lapides ejus et glebæ illius aurum
7. semitam ignoravit avis nec intuitus est oculus vulturis
8. non calcaverunt eam filii institorum nec pertransivit per eam leæna
9. ad silicem extendit manum suam subvertit a radicibus montes
10. in petris rivos excidit et omne pretiosum vidit oculus ejus
11. profunda quoque fluviorum scrutatus est et abscondita produxit in lucem
12. sapientia vero ubi invenitur et quis est locus intellegentiæ
13. nescit homo pretium ejus nec invenitur in terra suaviter viventium
14. abyssus dicit non est in me et mare loquitur non est mecum
15. non dabitur aurum obrizum pro ea nec adpendetur argentum in commutatione ejus
16. non conferetur tinctis Indiæ coloribus nec lapidi sardonico pretiosissimo vel sapphyro
17. non adæquabitur ei aurum vel vitrum nec commutabuntur pro ea vasa auri
18. excelsa et eminentia non memorabuntur conparatione ejus trahitur autem sapientia de occultis
19. non adæquabitur ei topazium de Æthiopia nec tincturæ mundissimæ conponetur
20. unde ergo sapientia veniet et quis est locus intellegentiæ
21. abscondita est ab oculis omnium viventium volucres quoque cæli latet
22. perditio et mors dixerunt auribus nostris audivimus famam ejus
23. Deus intellegit viam ejus et ipse novit locum illius
24. ipse enim fines mundi intuetur et omnia quæ sub cælo sunt respicit
25. qui fecit ventis pondus et aquas adpendit mensura
26. quando ponebat pluviis legem et viam procellis sonantibus
27. tunc vidit illam et enarravit et præparavit et investigavit
28. et dixit homini ecce timor Domini ipsa est sapientia et recedere a malo intellegentia