Evangelium secundum Ioannem, 1

1. in principio erat Verbum et Verbum erat apud Deum et Deus erat Verbum

1. In principio erat Verbum, et Verbum erat apud Deum, et Deus erat Verbum.

2. hoc erat in principio apud Deum

2. Hoc erat in principio apud Deum.

3. omnia per ipsum facta sunt et sine ipso factum est nihil quod factum est

3. Omnia per ipsum facta sunt, et sine ipso factum est nihil, quod factum est;

4. in ipso vita erat et vita erat lux hominum

4. in ipso vita erat, et vita erat lux hominum,

5. et lux in tenebris lucet et tenebræ eam non conprehenderunt

5. et lux in tenebris lucet, et tenebrae eam non comprehenderunt.

6. fuit homo missus a Deo cui nomen erat Johannes

6. Fuit homo missus a Deo, cui nomen erat Ioannes;

7. hic venit in testimonium ut testimonium perhiberet de lumine ut omnes crederent per illum

7. hic venit in testimonium, ut testimonium perhiberet de lumine, ut omnes crederent per illum.

8. non erat ille lux sed ut testimonium perhiberet de lumine

8. Non erat ille lux, sed ut testimonium perhiberet de lumine.

9. erat lux vera quæ inluminat omnem hominem venientem in mundum

9. Erat lux vera, quae illuminat omnem hominem, veniens in mundum.

10. in mundo erat et mundus per ipsum factus est et mundus eum non cognovit

10. In mundo erat, et mundus per ipsum factus est, et mundus eum non cognovit.

11. in propria venit et sui eum non receperunt

11. In propria venit, et sui eum non receperunt.

12. quotquot autem receperunt eum dedit eis potestatem filios Dei fieri his qui credunt in nomine ejus

12. Quotquot autem acceperunt eum, dedit eis potestatem filios Dei fieri, his, qui credunt in nomine eius,

13. qui non ex sanguinibus neque ex voluntate carnis neque ex voluntate viri sed ex Deo nati sunt

13. qui non ex sanguinibus neque ex voluntate carnis neque ex voluntate viri, sed ex Deo nati sunt.

14. et Verbum caro factum est et habitavit in nobis et vidimus gloriam ejus gloriam quasi unigeniti a Patre plenum gratiæ et veritatis

14. Et Verbum caro factum est et habitavit in nobis; et vidimus gloriam eius, gloriam quasi Unigeniti a Patre, plenum gratiae et veritatis.

15. Johannes testimonium perhibet de ipso et clamat dicens hic erat quem dixi vobis qui post me venturus est ante me factus est quia prior me erat

15. Ioannes testimonium perhibet de ipso et clamat dicens: “Hic erat, quem dixi: Qui post me venturus est, ante me factus est, quia prior me erat”.

16. et de plenitudine ejus nos omnes accepimus et gratiam pro gratia

16. Et de plenitudine eius nos omnes accepimus, et gratiam pro gratia;

17. quia lex per Mosen data est gratia et veritas per Jesum Christum facta est

17. quia lex per Moysen data est, gratia et veritas per Iesum Christum facta est.

18. Deum nemo vidit umquam unigenitus Filius qui est in sinu Patris ipse enarravit

18. Deum nemo vidit umquam; unigenitus Deus, qui est in sinum Patris, ipse enarravit.

19. et hoc est testimonium Johannis quando miserunt Judæi ab Hierosolymis sacerdotes et Levitas ad eum ut interrogarent eum tu quis es

19. Et hoc est testimonium Ioannis, quando miserunt ad eum Iudaei ab Hierosolymis sacerdotes et Levitas, ut interrogarent eum: “Tu quis es?”.

20. et confessus est et non negavit et confessus est quia non sum ego Christus

20. Et confessus est et non negavit; et confessus est: “Non sum ego Christus”.

21. et interrogaverunt eum quid ergo Helias es tu et dicit non sum propheta es tu et respondit non

21. Et interrogaverunt eum: “Quid ergo? Elias es tu?”. Et dicit: “Non sum”. “Propheta es tu?”. Et respondit: “Non”.

22. dixerunt ergo ei quis es ut responsum demus his qui miserunt nos quid dicis de te ipso

22. Dixerunt ergo ei: “Quis es? Ut responsum demus his, qui miserunt nos. Quid dicis de teipso?”.

23. ait ego vox clamantis in deserto dirigite viam Domini sicut dixit Esajas propheta

23. Ait: “Ego vox clamantis in deserto: “Dirigite viam Domini”, sicut dixit Isaias propheta”.

24. et qui missi fuerant erant ex Pharisæis

24. Et qui missi fuerant, erant ex pharisaeis;

25. et interrogaverunt eum et dixerunt ei quid ergo baptizas si tu non es Christus neque Helias neque propheta

25. et interrogaverunt eum et dixerunt ei: “Quid ergo baptizas, si tu non es Christus neque Elias neque propheta?”.

26. respondit eis Johannes dicens ego baptizo in aqua medius autem vestrum stetit quem vos non scitis

26. Respondit eis Ioannes dicens: “Ego baptizo in aqua; medius vestrum stat, quem vos non scitis,

27. ipse est qui post me venturus est qui ante me factus est cujus ego non sum dignus ut solvam ejus corrigiam calciamenti

27. qui post me venturus est, cuius ego non sum dignus, ut solvam eius corrigiam calceamenti”.

28. hæc in Bethania facta sunt trans Jordanen ubi erat Johannes baptizans

28. Haec in Bethania facta sunt trans Iordanem, ubi erat Ioannes baptizans.

29. altera die videt Johannes Jesum venientem ad se et ait ecce agnus Dei qui tollit peccatum mundi

29. Altera die videt Iesum venientem ad se et ait: “Ecce agnus Dei, qui tollit peccatum mundi.

30. hic est de quo dixi post me venit vir qui ante me factus est quia prior me erat

30. Hic est, de quo dixi: Post me venit vir, qui ante me factus est, quia prior me erat.

31. et ego nesciebam eum sed ut manifestaretur Israël propterea veni ego in aqua baptizans

31. Et ego nesciebam eum, sed ut manifestetur Israel, propterea veni ego in aqua baptizans”.

32. et testimonium perhibuit Johannes dicens quia vidi Spiritum descendentem quasi columbam de cælo et mansit super eum

32. Et testimonium perhibuit Ioannes dicens: “Vidi Spiritum descendentem quasi columbam de caelo, et mansit super eum;

33. et ego nesciebam eum sed qui misit me baptizare in aqua ille mihi dixit super quem videris Spiritum descendentem et manentem super eum hic est qui baptizat in Spiritu Sancto

33. et ego nesciebam eum, sed, qui misit me baptizare in aqua, ille mihi dixit: “Super quem videris Spiritum descendentem et manentem super eum, hic est qui baptizat in Spiritu Sancto”.

34. et ego vidi et testimonium perhibui quia hic est Filius Dei

34. Et ego vidi et testimonium perhibui quia hic est Filius Dei”.

35. altera die iterum stabat Johannes et ex discipulis ejus duo

35. Altera die iterum stabat Ioannes et ex discipulis eius duo,

36. et respiciens Jesum ambulantem dicit ecce agnus Dei

36. et respiciens Iesum ambulantem dicit: “Ecce agnus Dei”.

37. et audierunt eum duo discipuli loquentem et secuti sunt Jesum

37. Et audierunt eum duo discipuli loquentem et secuti sunt Iesum.

38. conversus autem Jesus et videns eos sequentes dicit eis quid quæritis qui dixerunt ei rabbi quod dicitur interpretatum magister ubi habitas

38. Conversus autem Iesus et videns eos sequentes se dicit eis: “Quid quaeritis?”. Qui dixerunt ei: “Rabbi — quod dicitur interpretatum Magister — ubi manes?”.

39. dicit eis venite et videte venerunt et viderunt ubi maneret et apud eum manserunt die illo hora autem erat quasi decima

39. Dicit eis: “Venite et videbitis”. Venerunt ergo et viderunt, ubi maneret, et apud eum manserunt die illo; hora erat quasi decima.

40. erat autem Andreas frater Simonis Petri unus ex duobus qui audierant ab Johanne et secuti fuerant eum

40. Erat Andreas, frater Simonis Petri, unus ex duobus, qui audierant ab Ioanne et secuti fuerant eum.

41. invenit hic primum fratrem suum Simonem et dicit ei invenimus Messiam quod est interpretatum Christus

41. Invenit hic primum fratrem suum Simonem et dicit ei: “Invenimus Messiam” — quod est interpretatum Christus C;

42. et adduxit eum ad Jesum intuitus autem eum Jesus dixit tu es Simon filius Johanna tu vocaberis Cephas quod interpretatur Petrus

42. adduxit eum ad Iesum. Intuitus eum Iesus dixit: “Tu es Simon filius Ioannis; tu vocaberis Cephas” — quod interpretatur Petrus C.

43. in crastinum voluit exire in Galilæam et invenit Philippum et dicit ei Jesus sequere me

43. In crastinum voluit exire in Galilaeam et invenit Philippum. Et dicit ei Iesus: “Sequere me”.

44. erat autem Philippus a Bethsaida civitate Andreæ et Petri

44. Erat autem Philippus a Bethsaida, civitate Andreae et Petri.

45. invenit Philippus Nathanaël et dicit ei quem scripsit Moses in lege et prophetæ invenimus Jesum filium Joseph a Nazareth

45. Invenit Philippus Nathanael et dicit ei: “Quem scripsit Moyses in Lege et Prophetae invenimus, Iesum filium Ioseph a Nazareth”.

46. et dixit ei Nathanaël a Nazareth potest aliquid boni esse dicit ei Philippus veni et vide

46. Et dixit ei Nathanael: “A Nazareth potest aliquid boni esse?”. Dicit ei Philippus: “Veni et vide”.

47. vidit Jesus Nathanaël venientem ad se et dicit de eo ecce vere Israhelita in quo dolus non est

47. Vidit Iesus Nathanael venientem ad se et dicit de eo: “Ecce vere Israelita, in quo dolus non est”.

48. dicit ei Nathanaël unde me nosti respondit Jesus et dixit ei priusquam te Philippus vocaret cum esses sub ficu vidi te

48. Dicit ei Nathanael: “Unde me nosti?”. Respondit Iesus et dixit ei: “Priusquam te Philippus vocaret, cum esses sub ficu, vidi te”.

49. respondit ei Nathanaël et ait rabbi tu es Filius Dei tu es rex Israël

49. Respondit ei Nathanael: “Rabbi, tu es Filius Dei, tu rex es Israel!”.

50. respondit Jesus et dixit ei quia dixi tibi vidi te sub ficu credis majus his videbis

50. Respondit Iesus et dixit ei: “Quia dixi tibi: Vidi te sub ficu, credis? Maiora his videbis”.

51. et dicit ei amen amen dico vobis videbitis cælum apertum et angelos Dei ascendentes et descendentes supra Filium hominis

51. Et dicit ei: “Amen, amen dico vobis: Videbitis caelum apertum et angelos Dei ascendentes et descendentes supra Filium hominis”.