Epistula ad Philippenses, 3
1. de cetero fratres mei gaudete in Domino eadem vobis scribere mihi quidem non pigrum vobis autem necessarium
1. De cetero, fratres mei, gaudete in Domino. Eadem vobis scribe re mihi quidem non pigrum, vobis autem securum.
2. videte canes videte malos operarios videte concisionem
2. Videte canes, videte malos operarios, videte concisionem!
3. nos enim sumus circumcisio qui spiritu Deo servimus et gloriamur in Christo Jesu et non in carne fiduciam habentes
3. Nos enim sumus circumcisio, qui Spiritu Dei servimus et gloriamur in Christo Iesu et non in carne fiduciam habentes,
4. quamquam ego habeam confidentiam et in carne si quis alius videtur confidere in carne ego magis
4. quamquam ego habeam confidentiam et in carne. Si quis alius videtur confidere in carne, ego magis:
5. circumcisus octava die ex genere Israël de tribu Beniamin Hebræus ex Hebræis secundum legem Pharisæus
5. circumcisus octava die, ex genere Israel, de tribu Beniamin, Hebraeus ex Hebraeis, secundum legem pharisaeus,
6. secundum æmulationem persequens ecclesiam Dei secundum justitiam quæ in lege est conversatus sine querella
6. secundum aemulationem persequens ecclesiam, secundum iustitiam, quae in lege est, conversatus sine querela.
7. sed quæ mihi fuerunt lucra hæc arbitratus sum propter Christum detrimenta
7. Sed, quae mihi erant lucra, haec arbitratus sum propter Christum detrimentum.
8. verumtamen existimo omnia detrimentum esse propter eminentem scientiam Jesu Christi Domini mei propter quem omnia detrimentum feci et arbitror ut stercora ut Christum lucri faciam
8. Verumtamen existimo omnia detrimentum esse propter eminentiam scientiae Christi Iesu Domini mei, propter quem omnia detrimentum feci et arbitror ut stercora, ut Christum lucrifaciam
9. et inveniar in illo non habens meam justitiam quæ ex lege est sed illam quæ ex fide est Christi quæ ex Deo est justitia in fide
9. et inveniar in illo non habens meam iustitiam, quae ex lege est, sed illam, quae per fidem est Christi, quae ex Deo est iustitia in fide;
10. ad agnoscendum illum et virtutem resurrectionis ejus et societatem passionum illius configuratus morti ejus
10. ad cognoscendum illum et virtutem resurrectionis eius et communionem passionum illius, conformans me morti eius,
11. si quo modo occurram ad resurrectionem quæ est ex mortuis
11. si quo modo occurram ad resurrectionem, quae est ex mortuis.
12. non quod jam acceperim aut jam perfectus sim sequor autem si conprehendam in quo et conprehensus sum a Christo Jesu
12. Non quod iam acceperim aut iam perfectus sim; persequor autem si umquam comprehendam, sicut et comprehensus sum a Christo Iesu.
13. fratres ego me non arbitror conprehendisse unum autem quæ quidem retro sunt obliviscens ad ea vero quæ sunt in priora extendens me
13. Fratres, ego me non arbitror comprehendisse; unum autem: quae quidem retro sunt, obliviscens, ad ea vero, quae ante sunt, extendens me
14. ad destinatum persequor ad bravium supernæ vocationis Dei in Christo Jesu
14. ad destinatum persequor, ad bravium supernae vocationis Dei in Christo Iesu.
15. quicumque ergo perfecti hoc sentiamus et si quid aliter sapitis et hoc vobis Deus revelabit
15. Quicumque ergo perfecti, hoc sentiamus; et si quid aliter sapitis, et hoc vobis Deus revelabit;
16. verumtamen ad quod pervenimus ut idem sapiamus et in eadem permaneamus regula
16. verumtamen, ad quod pervenimus, in eodem ambulemus.
17. imitatores mei estote fratres et observate eos qui ita ambulant sicut habetis formam nos
17. Coimitatores mei estote, fratres, et observate eos, qui ita ambulant, sicut habetis formam nos.
18. multi enim ambulant quos sæpe dicebam vobis nunc autem et flens dico inimicos crucis Christi
18. Multi enim ambulant, quos saepe dicebam vobis, nunc autem et flens dico, inimicos crucis Christi,
19. quorum finis interitus quorum deus venter et gloria in confusione ipsorum qui terrena sapiunt
19. quorum finis interitus, quorum deus venter et gloria in confusione ipsorum, qui terrena sapiunt.
20. nostra autem conversatio in cælis est unde etiam salvatorem expectamus Dominum Jesum Christum
20. Noster enim municipatus in caelis est, unde etiam salvatorem exspectamus Dominum Iesum Christum,
21. qui reformabit corpus humilitatis nostræ configuratum corpori claritatis suæ secundum operationem qua possit etiam subicere sibi omnia
21. qui transfigurabit corpus humilitatis nostrae, ut illud conforme faciat corpori gloriae suae secundum operationem, qua possit etiam subicere sibi omnia.
