Liber Exodus, 36
1. fecit ergo Beselehel et Hooliab et omnis vir sapiens quibus dedit Dominus sapientiam et intellectum ut scirent fabre operari quæ in usus sanctuarii necessaria sunt et quæ præcepit Dominus
2. cumque vocasset eos Moses et omnem eruditum virum cui dederat Deus sapientiam et qui sponte sua obtulerant se ad faciendum opus
3. tradidit eis universa donaria filiorum Israël qui cum instarent operi cotidie mane vota populus offerebat
4. unde artifices venire conpulsi
5. dixerunt Mosi plus offert populus quam necessarium est
6. jussit ergo Moses præconis voce cantari nec vir nec mulier quicquam ultra offerat in opere sanctuarii sicque cessatum est a muneribus offerendis
7. eo quod oblata sufficerent et superabundarent
8. feceruntque omnes corde sapientes ad explendum opus tabernaculi cortinas decem de bysso retorta et hyacintho et purpura coccoque bis tincto opere vario et arte polymita
9. quarum una habebat in longitudine viginti octo cubitos et in latitudine quattuor una mensura erat omnium cortinarum
10. coniunxitque cortinas quinque alteram alteri et alias quinque sibi invicem copulavit
11. fecit et ansas hyacinthinas in ora cortinæ unius ex utroque latere et in ora cortinæ alterius similiter
12. ut contra se invicem venirent ansæ et mutuo jungerentur
13. unde et quinquaginta fudit circulos aureos qui morderent cortinarum ansas et fieret unum tabernaculum
14. fecit et saga undecim de pilis caprarum ad operiendum tectum tabernaculi
15. unum sagum habebat in longitudine cubitos triginta et in latitudine cubitos quattuor unius mensuræ erant omnia saga
16. quorum quinque junxit seorsum et sex alia separatim
17. fecitque ansas quinquaginta in ora sagi unius et quinquaginta in ora sagi alterius ut sibi invicem jungerentur
18. et fibulas æneas quinquaginta quibus necteretur tectum et unum pallium ex omnibus sagis fieret
19. fecit et opertorium tabernaculi de pellibus arietum rubricatis aliudque desuper velamentum de pellibus janthinis
20. fecit et tabulas tabernaculi de lignis setthim stantes
21. decem cubitorum erat longitudo tabulæ unius et unum ac semis cubitum latitudo retinebat
22. binæ incastraturæ erant per singulas tabulas ut altera alteri jungeretur sic fecit in omnibus tabulis tabernaculi
23. e quibus viginti ad plagam meridianam erant contra austrum
24. cum quadraginta basibus argenteis duæ bases sub una tabula ponebantur ex utraque angulorum parte ubi incastraturæ laterum in angulis terminantur
25. ad plagam quoque tabernaculi quæ respicit ad aquilonem fecit viginti tabulas
26. cum quadraginta argenteis basibus duas bases per singulas tabulas
27. contra occidentem vero id est ad eam partem tabernaculi quæ mare respicit fecit sex tabulas
28. et duas alias per singulos angulos tabernaculi retro
29. quæ junctæ erant deorsum usque sursum et in unam conpagem pariter ferebantur ita fecit ex utraque parte per angulos
30. ut octo essent simul tabulæ et haberent bases argenteas sedecim binas scilicet bases sub singulis tabulis
31. fecit et vectes de lignis setthim quinque ad continendas tabulas unius lateris tabernaculi
32. et quinque alios ad alterius lateris tabulas coaptandas et extra hos quinque alios vectes ad occidentalem plagam tabernaculi contra mare
33. fecit quoque vectem alium qui per medias tabulas ab angulo usque ad angulum perveniret
34. ipsa autem tabulata deauravit et circulos eorum fecit aureos per quos vectes induci possint quos et ipsos aureis lamminis operuit
35. fecit et velum de hyacintho purpura vermiculo ac bysso retorta opere polymitario varium atque distinctum
36. et quattuor columnas de lignis setthim quas cum capitibus deauravit fusis basibus earum argenteis
37. fecit et tentorium in introitu tabernaculi ex hyacintho purpura vermiculo byssoque retorta opere plumarii
38. et columnas quinque cum capitibus suis quas operuit auro basesque earum fudit æneas