1. altitudinis firmamentum pulchritudo est species cæli in visione gloriæ

2. sol in aspectu adnuntians in exitu vas admirabile opus Excelsi

3. in meridiano exuret terram in conspectu ardoris ejus quis poterit sustinere fornacem custodiens in operibus ardoris

4. tripliciter sol exurens montes radios igneos exsuflans et refulgens radiis suis obcæcat oculos

5. magnus Dominus qui fecit illum et in sermonibus ejus festinavit iter

6. et luna in omnibus in tempore suo ostensio temporis et signum ævi

7. a luna signum diei festi luminare quod minuitur in consummatione

8. mensis secundum nomen ejus est crescens admirabiliter in consummatione

9. vas castrorum in excelsis in firmamento cæli resplendens

10. species cæli gloriosa stellarum mundum inluminans in excelsis Dominus

11. in verbis Sancti stabunt ad judicium et non exardescent in vigiliis suis

12. vide arcum et benedic qui fecit illum valde speciosus est in splendore suo

13. gyravit cælum in circuitu gloriæ suæ manus Excelsi aperuerunt illum

14. imperio suo adceleravit nivem et adcelerat coruscationes emittere judicii sui

15. propterea aperti sunt thesauri et evolaverunt nebulæ sicut aves

16. in magnitudine sua posuit nubes et confracti sunt lapides grandinis

17. in conspectu ejus commovebuntur montes et in voluntate ejus adspirabit notus

18. vox tonitrui ejus exprobravit terram tempestas aquilonis et congregatio spiritus

19. sicut avis deponens ad sedendum aspargit nivem et sicut lucusta demergens descensus ejus

20. pulchritudinem coloris ejus admirabitur oculus et super imbrem ejus expavescet cor

21. gelum sicut salem effundet super terram et dum gelaverit fiet tamquam cacumina tribuli

22. frigidus ventus aquilo flabit et gelabit cristallus ab aqua super omnem congregationem aquarum requiescet et sicut lorica induet se aquis

23. devorabit montes et exuret desertum et extinguet viridem sicut ignem

24. medicina omnium in festinationem nebulæ ros obvians ab ardore venienti humilem efficiet eum

25. in sermone ejus silebit ventus et plantavit illum Dominus Jesus

26. qui navigat mare enarrat periculum ejus et audientes auribus non admirabimur

27. illic præclara et mirabilia opera varia genera bestiarum et omnium pecorum et creatura beluarum

28. propter ipsum confirmatus est itineris finis et in sermone ejus conposita sunt omnia

29. multa dicemus et deficiemus verbis consummatio autem sermonum ipse est in omnibus

30. gloriantes ad quid valebimus ipse enim Omnipotens super omnia opera sua

31. terribilis Dominus et magnus vehementer

32. quantumcumque potueritis supervalebit adhuc et admirabilis magnificentia ejus

33. benedicentes Dominum exaltate illum quantum potestis major est enim omni laude

34. exaltantes eum replemini virtute ne laboretis non enim habebitis

35. quis vidit eum et enarrabit et quis magnificabit eum sicut est ab initio

36. multa abscondita sunt majora horum pauca enim vidimus operum ejus

37. omnia autem Dominus fecit et pie agentibus dedit sapientiam





“O passado não conta mais para o Senhor. O que conta é o presente e estar atento e pronto para reparar o que foi feito.” São Padre Pio de Pietrelcina