Liber Baruch, 3

1. et nunc Domine omnipotens Deus Israël anima in angustiis et spiritus anxius clamat ad te

2. audi Domine et miserere quia Deus es misericors et miserere nostri quia peccavimus ante te

3. quia tu sedes in sempiternum et nos peribimus in ævum

4. Domine omnipotens Deus Israël audi nunc orationem mortuorum Israël et filiorum ipsorum qui peccaverunt ante te et non audierunt vocem Domini Dei sui et adglutinata sunt nobis mala

5. noli meminisse iniquitates patrum nostrorum sed memento manus tuæ et nominis tui in tempore isto

6. quia tu es Dominus Deus noster et laudabimus te Domine

7. quia propter hoc dedisti timorem tuum in cordibus nostris et ut invocemus nomen tuum et laudemus te in captivitate nostra quia convertemus iniquitatem patrum nostrorum qui peccaverunt ante te

8. et ecce nos hodie in captivitate nostra sumus quo nos dispersisti in inproperium et in maledictum et in peccatum secundum omnes iniquitates patrum nostrorum qui discesserunt a te Domine Deus noster

9. audi Israël mandata vitæ auribus percipite ut scias prudentiam

10. quid est Israël quid est quod in terra es inimicorum

11. inveterasti in terra aliena coinquinatus es cum mortuis deputatus es cum descendentibus in infernum

12. dereliquisti fontem sapientiæ

13. si in via Dei ambulasses habitasses in pace sempiterna

14. disce ubi sit prudentia ubi sit virtus ubi sit intellectus ut scias simul ubi sit longiturnitas vitæ et victus ubi sit lumen oculorum et pax

15. quis invenit locum ejus et quis intravit in thesauros ejus

16. ubi sunt principes gentium et qui dominantur super bestias quæ sunt super terram

17. qui in avibus cæli inludunt

18. qui argentum thesaurizant et aurum in quo confidebant homines et non est finis adquisitionis eorum qui argentum fabricant et solliciti sunt nec est inventio operum illorum

19. exterminati sunt et ad inferos descenderunt et alii loco eorum exsurrexerunt

20. juvenes viderunt lumen et habitaverunt super terram viam autem disciplinæ ignoraverunt

21. neque intellexerunt semitas ejus neque filii eorum susceperunt eam a facie ipsorum longe facta est

22. non est audita in terra Chanaan neque visa est in Theman

23. filii quoque Agar qui exquirunt prudentiam quæ de terra est negotiatores Merræ et Theman et fabulatores et exquisitores intellegentiæ viam autem sapientiæ nescierunt neque commemorati sunt semitas ejus

24. o Israël quam magna est domus Dei et ingens locus possessionis ejus

25. magnus et non habet finem excelsus et inmensus

26. ibi fuerunt gigantes nominati illi qui ab initio fuerunt statura magna scientes bellum

27. non hos elegit Deus neque viam disciplinæ dedit illis et perierunt

28. eo quod non haberent sapientiam et perierunt propter insipientiam suam

29. quis ascendit in cælum et accepit eam et deduxit eam de nubibus

30. quis transfretavit mare et invenit illam et adtulit illam super aurum electum

31. non est qui possit scire viam ejus neque qui exquirat semitas ejus

32. sed qui scit universa novit eam et invenit eam prudentia sua qui præparavit terram in æterno tempore et replevit eam pecudibus et quadrupedibus

33. qui emittit lumen et vadit et vocavit illud et obaudit illi in tremore

34. stellæ autem lumen dederunt in custodiis suis et lætatæ sunt

35. vocatæ sunt et dixerunt adsumus et luxerunt ei cum jucunditate qui fecit illas

36. hic Deus noster non æstimabitur alius adversus eum

37. hic adinvenit omnem viam disciplinæ et tradidit illam Jacob puero suo et Israël dilecto suo

38. post hæc in terris visus est et cum hominibus conversatus est