Liber Deuteronomii, 6
1. hæc sunt præcepta et cærimoniæ atque judicia quæ mandavit Dominus Deus vester ut docerem vos et faciatis ea in terra ad quam transgredimini possidendam
1. Haec sunt mandata et praecep ta atque iudicia, quae mandavit Dominus Deus vester, ut docerem vos, et faciatis ea in terra, ad quam transgredimini possidendam;
2. ut timeas Dominum Deum tuum et custodias omnia mandata et præcepta ejus quæ ego præcipio tibi et filiis ac nepotibus tuis cunctis diebus vitæ tuæ ut prolongentur dies tui
2. ut timeas Dominum Deum tuum et custodias omnia praecepta et mandata eius, quae ego praecipio tibi et filiis ac nepotibus tuis, cunctis diebus vitae tuae, ut prolongentur dies tui.
3. audi Israël et observa ut facias et bene sit tibi et multipliceris amplius sicut pollicitus est Dominus Deus patrum tuorum tibi terram lacte et melle manantem
3. Audi, Israel, et observa, ut facias, et bene sit tibi, et multipliceris amplius, sicut pollicitus est Dominus, Deus patrum tuorum, tibi terram lacte et melle manantem.
4. audi Israël Dominus Deus noster Dominus unus est
4. Audi, Israel: Dominus Deus noster Dominus unus est.
5. diliges Dominum Deum tuum ex toto corde tuo et ex tota anima tua et ex tota fortitudine tua
5. Diliges Dominum Deum tuum ex toto corde tuo et ex tota anima tua et ex tota fortitudine tua.
6. eruntque verba hæc quæ ego præcipio tibi hodie in corde tuo
6. Eruntque verba haec, quae ego praecipio tibi hodie, in corde tuo,
7. et narrabis ea filiis tuis et meditaberis sedens in domo tua et ambulans in itinere dormiens atque consurgens
7. et inculcabis ea filiis tuis et loqueris ea sedens in domo tua et ambulans in itinere, decumbens atque consurgens;
8. et ligabis ea quasi signum in manu tua eruntque et movebuntur inter oculos tuos
8. et ligabis ea quasi signum in manu tua, eruntque quasi appensum quid inter oculos tuos,
9. scribesque ea in limine et ostiis domus tuæ
9. scribesque ea in postibus domus tuae et in portis tuis.
10. cumque introduxerit te Dominus Deus tuus in terram pro qua juravit patribus tuis Abraham Isaac et Jacob et dederit tibi civitates magnas et optimas quas non ædificasti
10. Cumque introduxerit te Dominus Deus tuus in terram, pro qua iuravit patribus tuis Abraham, Isaac et Iacob, ut daret tibi, civitates magnas et optimas, quas non aedificasti,
11. domos plenas cunctarum opum quas non extruxisti cisternas quas non fodisti vineta et oliveta quæ non plantasti
11. domos plenas cunctarum opum, quas non implevisti, cisternas, quas non fodisti, vineta et oliveta, quae non plantasti, et comederis et saturatus fueris,
12. et comederis et saturatus fueris
12. cave diligenter, ne obliviscaris Domini, qui eduxit te de terra Aegypti, de domo servitutis:
13. cave diligenter ne obliviscaris Domini qui eduxit te de terra Ægypti de domo servitutis Dominum Deum tuum timebis et ipsi servies ac per nomen illius jurabis
13. Dominum Deum tuum timebis et ipsi servies ac per nomen illius iurabis.
14. non ibitis post deos alienos cunctarum gentium quæ in circuitu vestro sunt
14. Non ibitis post deos alienos, de diis gentium, quae in circuitu vestro sunt,
15. quoniam Deus æmulator Dominus Deus tuus in medio tui nequando irascatur furor Domini Dei tui contra te et auferat te de superficie terræ
15. quoniam Deus aemulator Dominus Deus tuus in medio tui; ne quando irascatur furor Domini Dei tui contra te et auferat te de superficie terrae.
16. non temptabis Dominum Deum tuum sicut temptasti in loco temptationis
16. Non tentabitis Dominum Deum vestrum, sicut tentastis in Massa.
17. custodi præcepta Domini Dei tui ac testimonia et cærimonias quas præcepit tibi
17. Custodite mandata Domini Dei vestri ac testimonia et praecepta, quae praecepit tibi;
18. et fac quod placitum est et bonum in conspectu Domini ut bene sit tibi et ingressus possideas terram optimam de qua juravit Dominus patribus tuis
18. et fac, quod rectum est et bonum in conspectu Domini, ut bene sit tibi, et ingressus possideas terram optimam, de qua iuravit Dominus patribus tuis,
19. ut deleret omnes inimicos tuos coram te sicut locutus est
19. ut deleret omnes inimicos tuos coram te, sicut locutus est Dominus.
20. cum interrogaverit te filius tuus cras dicens quid sibi volunt testimonia hæc et cærimoniæ atque judicia quæ præcepit Dominus Deus noster nobis
20. Cumque interrogaverit te filius tuus cras dicens: “Quid sibi volunt testimonia haec et praecepta atque iudicia, quae praecepit Dominus Deus noster vobis?”,
21. dices ei servi eramus Pharaonis in Ægypto et eduxit nos Dominus de Ægypto in manu forti
21. dices ei: “Servi eramus pharaonis in Aegypto, et eduxit nos Dominus de Aegypto in manu forti
22. fecitque signa atque prodigia magna et pessima in Ægypto contra Pharaonem et omnem domum illius in conspectu nostro
22. fecitque signa atque prodigia magna et pessima in Aegypto contra pharaonem et omnem domum illius in conspectu nostro;
23. et eduxit nos inde ut introductis daret terram super qua juravit patribus nostris
23. et eduxit nos inde, ut introductis daret terram, super qua iuravit patribus nostris.
24. præcepitque nobis Dominus ut faciamus omnia legitima hæc et timeamus Dominum Deum nostrum et bene sit nobis cunctis diebus vitæ nostræ sicut est hodie
24. Praecepitque nobis Dominus, ut faciamus omnia praecepta haec et timeamus Dominum Deum nostrum, et bene sit nobis cunctis diebus vitae nostrae, sicut est hodie.
25. eritque nostri misericors si custodierimus et fecerimus omnia præcepta ejus coram Domino Deo nostro sicut mandavit nobis
25. Eritque iustitia nobis, si custodierimus et fecerimus omnia mandata haec coram Domino Deo nostro, sicut mandavit nobis”.
