Liber II Samuelis, 23
1. hæc autem sunt verba novissima quæ dixit David filius Isai dixit vir cui constitutum est de christo Dei Jacob egregius psalta Israël
2. spiritus Domini locutus est per me et sermo ejus per linguam meam
3. dixit Deus Israël mihi locutus est Fortis Israël dominator hominum justus dominator in timore Dei
4. sicut lux auroræ oriente sole mane absque nubibus rutilat et sicut pluviis germinat herba de terra
5. nec tanta est domus mea apud Deum ut pactum æternum iniret mecum firmum in omnibus atque munitum cuncta enim salus mea et omnis voluntas nec est quicquam ex ea quod non germinet
6. prævaricatores autem quasi spinæ evellentur universi quæ non tolluntur manibus
7. et si quis tangere voluerit eas armabitur ferro et ligno lanceato igneque succensæ conburentur usque ad nihilum
8. hæc nomina fortium David Sedens in cathedra sapientissimus princeps inter tres ipse est quasi tenerrimus ligni vermiculus qui octingentos interfecit impetu uno
9. post hunc Eleazar filius patrui ejus Ahoi inter tres fortes qui erant cum David quando exprobraverunt Philisthim et congregati sunt illuc in prœlium
10. cumque ascendissent viri Israël ipse stetit et percussit Philistheos donec deficeret manus ejus et obrigesceret cum gladio fecitque Dominus salutem magnam in die illa et populus qui fugerat reversus est ad cæsorum spolia detrahenda
11. et post hunc Semma filius Age de Arari et congregati sunt Philisthim in statione erat quippe ibi ager plenus lente cumque fugisset populus a facie Philisthim
12. stetit ille in medio agri et tuitus est eum percussitque Philistheos et fecit Dominus salutem magnam
13. necnon ante descenderant tres qui erant principes inter triginta et venerant tempore messis ad David in speluncam Odollam castra autem Philisthim erant posita in valle Gigantum
14. et David erat in præsidio porro statio Philisthinorum tunc erat in Bethleem
15. desideravit igitur David et ait si quis mihi daret potum aquæ de cisterna quæ est in Bethleem juxta portam
16. inruperunt ergo tres fortes castra Philisthinorum et hauserunt aquam de cisterna Bethleem quæ erat juxta portam et adtulerunt ad David at ille noluit bibere sed libavit illam Domino
17. dicens propitius mihi sit Dominus ne faciam hoc num sanguinem hominum istorum qui profecti sunt et animarum periculum bibam noluit ergo bibere hæc fecerunt tres robustissimi
18. Abisai quoque frater Joab filius Sarviæ princeps erat de tribus ipse est qui elevavit hastam suam contra trecentos quos interfecit nominatus in tribus
19. et inter tres nobilior eratque eorum princeps sed usque ad tres primos non pervenerat
20. et Banajas filius Jojada viri fortissimi magnorum operum de Capsehel ipse percussit duos leones Moab et ipse descendit et percussit leonem in media cisterna diebus nivis
21. ipse quoque interfecit virum ægyptium virum dignum spectaculo habentem in manu hastam itaque cum descendisset ad eum in virga vi extorsit hastam de manu Ægyptii et interfecit eum hasta sua
22. hæc fecit Banajas filius Jojadæ
23. et ipse nominatus inter tres robustos qui erant inter triginta nobiliores verumtamen usque ad tres non pervenerat fecitque eum David sibi auricularium a secreto
24. Asaël frater Joab inter triginta Eleanan filius patrui ejus de Bethleem
25. Semma de Arari Helica de Arodi
26. Helas de Felthi Hira filius Aces de Thecua
27. Abiezer de Anathoth Mobonnai de Usathi
28. Selmon Aohites Maharai Netophathites
29. Heled filius Banaa et ipse Netophathites Hithai filius Ribai de Gebeeth filiorum Beniamin
30. Banahi Aufrathonites Heddai de torrente Gaas
31. Abialbon Arbathites Azmaveth de Beromi
32. Eliaba de Salboni filii Jasen Jonathan
33. Semma de Horodi Hajam filius Sarar Arorites
34. Elifeleth filius Aasbai filii Maachathi Heliam filius Ahitofel Gelonites
35. Esrai de Carmelo Farai de Arbi
36. Igaal filius Nathan de Soba Bonni de Gaddi
37. Selech de Ammoni Naharai Berothites armiger Joab filii Sarviæ
38. Hira Hiethrites Gareb et ipse Hiethrites
39. Urias Hettheus omnes triginta septem