Liber Genesis, 40
1. his ita gestis accidit ut peccarent duo eunuchi pincerna regis Ægypti et pistor domino suo
2. iratusque Pharao contra eos nam alter pincernis præerat alter pistoribus
3. misit eos in carcerem principis militum in quo erat vinctus et Joseph
4. at custos carceris tradidit eos Joseph qui et ministrabat eis aliquantum temporis fluxerat et illi in custodia tenebantur
5. videruntque ambo somnium nocte una juxta interpretationem congruam sibi
6. ad quos cum introisset Joseph mane et vidisset eos tristes
7. sciscitatus est dicens cur tristior est hodie solito facies vestra
8. qui responderunt somnium vidimus et non est qui interpretetur nobis dixitque ad eos Joseph numquid non Dei est interpretatio referte mihi quid videritis
9. narravit prior præpositus pincernarum somnium videbam coram me vitem
10. in qua erant tres propagines crescere paulatim gemmas et post flores uvas maturescere
11. calicemque Pharaonis in manu mea tuli ergo uvas et expressi in calicem quem tenebam et tradidi poculum Pharaoni
12. respondit Joseph hæc est interpretatio somnii tres propagines tres adhuc dies sunt
13. post quos recordabitur Pharao magisterii tui et restituet te in gradum pristinum dabisque ei calicem juxta officium tuum sicut facere ante consueveras
14. tantum memento mei cum tibi bene fuerit et facies mecum misericordiam ut suggeras Pharaoni et educat me de isto carcere
15. quia furto sublatus sum de terra Hebræorum et hic innocens in lacum missus sum
16. videns pistorum magister quod prudenter somnium dissolvisset ait et ego vidi somnium quod haberem tria canistra farinæ super caput meum
17. et in uno canistro quod erat excelsius portare me omnes cibos qui fiunt arte pistoria avesque comedere ex eo
18. respondit Joseph hæc est interpretatio somnii tria canistra tres adhuc dies sunt
19. post quos auferet Pharao caput tuum ac suspendet te in cruce et lacerabunt volucres carnes tuas
20. exin dies tertius natalicius Pharaonis erat qui faciens grande convivium pueris suis recordatus est inter epulas magistri pincernarum et pistorum principis
21. restituitque alterum in locum suum ut porrigeret regi poculum
22. alterum suspendit in patibulo ut coniectoris veritas probaretur
23. et tamen succedentibus prosperis præpositus pincernarum oblitus est interpretis sui