Liber Esdrae, 8

1. hii sunt ergo principes familiarum et genealogia eorum qui ascenderunt mecum in regno Artarxersis regis de Babylone

1. Hi sunt ergo principes familiarum et genealogia eorum, qui ascenderunt mecum in regno Artaxerxis regis de Babylone:

2. de filiis Finees Gersom de filiis Ithamar Danihel de filiis David Attus

2. De filiis Phinees, Gersom. De filiis Ithamar, Daniel. De filiis David, Hattus filius Secheniae.

3. de filiis Secheniæ et de filiis Pharos Zaccharias et cum eo numerati sunt viri centum quinquaginta

3. De filiis Pharos, Zacharias; et cum eo numerati sunt viri centum quinquaginta.

4. de filiis Phæthmoab Heliœnai filius Zareæ et cum eo ducenti viri

4. De filiis Phahathmoab, Elioenai filius Zaraiae, et cum eo ducenti viri.

5. de filiis Secheniæ filius Hiezihel et cum eo trecenti viri

5. De filiis Zethua, Sechenia filius Iahaziel, et cum eo trecenti viri.

6. de filiis Adden Abeth filius Jonathan et cum eo quinquaginta viri

6. De filiis Adin, Ebed filius Ionathan, et cum eo quinquaginta viri.

7. de filiis Helam Isajas filius Athaliæ et cum eo septuaginta viri

7. De filiis Elam, Iesaias filius Athaliae, et cum eo septuaginta viri.

8. de filiis Saphatiæ Zebedia filius Michaël et cum eo octoginta viri

8. De filiis Saphatiae, Zabadia filius Michael, et cum eo octoginta viri.

9. de filiis Joab Obedia filius Jehihel et cum eo ducenti decem et octo viri

9. De filiis Ioab, Abdia filius Iahiel, et cum eo ducenti decem et octo viri.

10. de filiis Selomith filius Josphiæ et cum eo centum sexaginta viri

10. De filiis Bani, Selomith filius Iosphiae, et cum eo centum sexaginta viri.

11. de filiis Bebai Zaccharias filius Bebai et cum eo viginti octo viri

11. De filiis Bebai, Zacharias filius Bebai, et cum eo viginti octo viri.

12. de filiis Ezgad Johanan filius Eccetan et cum eo centum decem viri

12. De filiis Azgad, Iohanan filius Eccetan, et cum eo centum et decem viri.

13. de filiis Adonicam qui erant novissimi et hæc nomina eorum Helifeleth et Heihel et Samajas et cum eis sexaginta viri

13. De filiis Adonicam ascenderunt iuniores, et haec nomina eorum: Eliphalet et Iehiel et Semeias, et cum eis sexaginta viri.

14. de filiis Beggui Uthai et Zacchur et cum eo septuaginta viri

14. De filiis Beguai, Uthai filius Zabud, et cum eis septuaginta viri.

15. congregavi autem eos ad fluvium qui decurrit ad Ahavva et mansimus ibi diebus tribus quæsivique in populo et in sacerdotibus de filiis Levi et non inveni ibi

15. Congregavi autem eos ad fluvium, qui decurrit ad Ahava, et mansimus ibi tribus diebus. Recensui populum et sacerdotes; de filiis autem Levi non inveni ibi.

16. itaque misi Heliezer et Arihel et Semeam et Helnathan et Jarib et alterum Helnathan et Nathan et Zacchariam et Mesolam principes et Joarib et Helnathan sapientes

16. Itaque misi Eliezer et Ariel et Semeiam et Ioiarib et Elnathan et Nathan et Zachariam et Mosollam principes sapientes.

17. et misi eos ad Heddo qui est primus in Casphiæ loco et posui in ore eorum verba quæ loquerentur ad Addom et ad fratres ejus Nathinneos in loco Casphiæ ut adducerent nobis ministros domus Dei nostri

17. Et misi eos ad Eddo, qui est primus in Chasphiae loco, et posui in ore eorum verba, quae loquerentur ad Eddo et fratres eius, ut adducerent nobis ministros domus Dei nostri.

18. et adduxerunt nobis per manum Dei nostri bonam super nos virum doctissimum de filiis Moolli filii Levi filii Israël et Sarabiam et filios ejus et fratres ejus decem et octo

18. Et adduxerunt nobis per manum Dei nostri bonam super nos virum doctissimum de filiis Moholi filii Levi filii Israel nomine Serebiam et filios eius et fratres eius decem et octo

19. et Asabiam et cum eo Isajam de filiis Merari fratres ejus et filios ejus viginti

19. et Hasabiam et cum eo Iesaiam de filiis Merari filiosque eius et fratres eius viginti

20. et de Nathinneis quos dederat David et principes ad ministeria Levitarum Nathinneos ducentos viginti omnes hii suis nominibus vocabantur

20. et de oblatis, quos dederant David et principes ad ministeria Levitarum, ducentos viginti viros; omnes hi suis nominibus recensiti sunt.

21. et prædicavi ibi jejunium juxta fluvium Ahavva ut adfligeremur coram Domino Deo nostro et peteremus ab eo viam rectam nobis et filiis nostris universæque substantiæ nostræ

21. Et praedicavi ibi ieiunium iuxta fluvium Ahava, ut affligeremur coram Deo nostro et peteremus ab eo iter prosperum nobis et filiis nostris universaeque substantiae nostrae.

22. erubui enim petere regem auxilium et equites qui defenderent nos ab inimico in via quia dixeramus regi manus Dei nostri est super omnes qui quærunt eum in bonitate et imperium ejus et fortitudo ejus et furor super omnes qui derelinquunt eum

22. Erubui enim petere a rege praesidium et equites, qui defenderent nos ab inimico in via, quia dixeramus regi: “Manus Dei nostri est super omnes, qui quaerunt eum in bonitate, et potentia eius et fortitudo eius super omnes, qui derelinquunt eum”.

23. jejunavimus autem et rogavimus Deum nostrum pro hoc et evenit nobis prospere

23. Ieiunavimus autem et rogavimus Deum nostrum per hoc, et evenit nobis prospere.

24. et separavi de principibus sacerdotum duodecim Sarabian Asabian et cum eis de fratribus eorum decem

24. Et separavi de principibus sacerdotum duodecim, Serebiam et Hasabiam et cum eis de fratribus eorum decem,

25. adpendique eis argentum et aurum et vasa consecrata domus Dei nostri quæ obtulerat rex et consiliatores ejus et principes ejus universusque Israël eorum qui inventi fuerant

25. appendique eis argentum et aurum et vasa: tributum domus Dei nostri, quod obtulerat rex et consiliatores eius et principes eius universusque Israel eorum, qui ibi inveniebantur.

26. et adpendi in manibus eorum argenti talenta sescenta quinquaginta et vasa argentea centum auri centum talenta

26. Et appendi in manibus eorum argenti talenta sescenta quinquaginta et vasa argentea centum, quae habebant talenta duo, auri centum talenta,

27. et crateras aureos viginti qui habebant solidos millenos et vasa æris fulgentis optimi duo pulchra ut aurum

27. et crateres aureos viginti, qui habebant solidos millenos, et vasa aeris fulgentis optimi duo pretiosa ut aurum.

28. et dixi eis vos sancti Domini et vasa sancta et argentum et aurum quod sponte oblatum est Domino Deo patrum vestrorum

28. Et dixi eis: “Vos sancti Domini, et vasa sancta et argentum et aurum consecrata Domino, Deo patrum nostrorum;

29. vigilate et custodite donec adpendatis coram principibus sacerdotum et Levitarum et ducibus familiarum Israël in Hierusalem et thesaurum domus Domini

29. vigilate et custodite, donec appendatis coram principibus sacerdotum et Levitarum et ducibus familiarum Israel in Ierusalem, in habitaculis domus Domini”.

30. susceperunt autem sacerdotes et Levitæ pondus argenti et auri et vasorum ut deferrent in Hierusalem in domum Dei nostri

30. Susceperunt autem sacerdotes et Levitae pondus argenti et auri et vasorum, ut deferrent Ierusalem in domum Dei nostri.

31. promovimus ergo a flumine Ahavva duodecimo die mensis primi ut pergeremus Hierusalem et manus Dei nostri fuit super nos et liberavit nos de manu inimici et insidiatoris in via

31. Promovimus ergo a flumine Ahava duodecimo die mensis primi, ut pergeremus Ierusalem; et manus Dei nostri fuit super nos et liberavit nos de manu inimici et insidiatoris in via,

32. et venimus Hierusalem et mansimus ibi diebus tribus

32. et venimus Ierusalem et mansimus ibi tribus diebus.

33. die autem quarta adpensum est argentum et aurum et vasa in domo Dei nostri per manum Meremoth filii Uriæ sacerdotis et cum eo Eleazar filius Finees cumque eis Jozaded filius Josue et Noadaja filius Bennoi Levitæ

33. Die autem quarta appensum est argentum et aurum et vasa in domo Dei nostri per manum Meremoth filii Uriae sacerdotis et cum eo Eleazar filius Phinees cumque eis Iozabad filius Iesua et Noadia filius Bennui Levitae,

34. juxta numerum et pondus omnium descriptumque est omne pondus in tempore illo

34. iuxta numerum et pondus omnia; descriptumque est omne pondus. In tempore illo,

35. sed et qui venerant de captivitate filii transmigrationis obtulerunt holocaustomata Deo Israël vitulos duodecim pro omni Israël arietes nonaginta sex agnos septuaginta septem hircos pro peccato duodecim omnia in holocaustum Domino

35. qui venerant de captivitate, filii transmigrationis, obtulerunt holocautomata Deo Israel, vitulos duodecim pro omni populo Israel, arietes nonaginta sex, agnos septuaginta septem, hircos pro peccato duodecim: omnia in holocaustum Domino.

36. dederunt autem edicta regis satrapis qui erant de conspectu regis et ducibus trans Flumen et elevaverunt populum et domum Dei

36. Dederunt autem edicta regis satrapis regis et ducibus trans flumen et sublevaverunt populum et domum Dei.