1. dixit quoque Dominus ad Mosen loquere ad sacerdotes filios Aaron et dices eis ne contaminetur sacerdos in mortibus civium suorum

2. nisi tantum in consanguineis ac propinquis id est super matre et patre et filio ac filia fratre quoque

3. et sorore virgine quæ non est nupta viro

4. sed nec in principe populi sui contaminabitur

5. non radent caput nec barbam neque in carnibus suis facient incisuras

6. sancti erunt Deo suo et non polluent nomen ejus incensum enim Domini et panes Dei sui offerunt et ideo sancti erunt

7. scortum et vile prostibulum non ducet uxorem nec eam quæ repudiata est a marito quia consecratus est Deo suo

8. et panes propositionis offert sit ergo sanctus quia et ego sanctus sum Dominus qui sanctifico vos

9. sacerdotis filia si deprehensa fuerit in stupro et violaverit nomen patris sui flammis exuretur

10. pontifex id est sacerdos maximus inter fratres suos super cujus caput fusum est unctionis oleum et cujus manus in sacerdotio consecratæ sunt vestitusque est sanctis vestibus caput suum non discoperiet vestimenta non scindet

11. et ad omnem mortuum non ingredietur omnino super patre quoque suo et matre non contaminabitur

12. nec egredietur de sanctis ne polluat sanctuarium Domini quia oleum sanctæ unctionis Dei sui super eum est ego Dominus

13. virginem ducet uxorem

14. viduam et repudiatam et sordidam atque meretricem non accipiet sed puellam de populo suo

15. ne commisceat stirpem generis sui vulgo gentis suæ quia ego Dominus qui sanctifico eum

16. locutusque est Dominus ad Mosen dicens

17. loquere ad Aaron homo de semine tuo per familias qui habuerit maculam non offeret panes Deo suo

18. nec accedet ad ministerium ejus si cæcus fuerit si claudus si vel parvo vel grandi et torto naso

19. si fracto pede si manu

20. si gibbus si lippus si albuginem habens in oculo si jugem scabiem si inpetiginem in corpore vel hirniosus

21. omnis qui habuerit maculam de semine Aaron sacerdotis non accedet offerre hostias Domino nec panes Deo suo

22. vescetur tamen panibus qui offeruntur in sanctuario

23. ita dumtaxat ut intra velum non ingrediatur nec accedat ad altare quia maculam habet et contaminare non debet sanctuarium meum ego Dominus qui sanctifico eos

24. locutus est ergo Moses ad Aaron et filios ejus et ad omnem Israël cuncta quæ sibi fuerant imperata



Livros sugeridos


“Não se aflija a ponto de perder a paz interior. Reze com perseverança, com confiança, com calma e serenidade.” São Padre Pio de Pietrelcina

Newsletter

Receba as novidades, artigos e noticias deste portal.