Epistula ad Romanos, 15

1. debemus autem nos firmiores inbecillitates infirmorum sustinere et non nobis placere

1. Debemus autem nos fir miores imbecillitates infir morum sustinere et non nobis placere.

2. unusquisque vestrum proximo suo placeat in bonum ad ædificationem

2. Unusquisque nostrum proximo placeat in bonum ad aedificationem;

3. etenim Christus non sibi placuit sed sicut scriptum est inproperia inproperantium tibi ceciderunt super me

3. etenim Christus non sibi placuit, sed sicut scriptum est: “Improperia improperantium tibi ceciderunt super me”.

4. quæcumque enim scripta sunt ad nostram doctrinam scripta sunt ut per patientiam et consolationem scripturarum spem habeamus

4. Quaecumque enim antea scripta sunt, ad nostram doctrinam scripta sunt, ut per patientiam et consolationem Scripturarum spem habeamus.

5. Deus autem patientiæ et solacii det vobis id ipsum sapere in alterutrum secundum Jesum Christum

5. Deus autem patientiae et solacii det vobis idipsum sapere in alterutrum secundum Christum Iesum,

6. ut unianimes uno ore honorificetis Deum et Patrem Domini nostri Jesu Christi

6. ut unanimes uno ore glorificetis Deum et Patrem Domini nostri Iesu Christi.

7. propter quod suscipite invicem sicut et Christus suscepit vos in honorem Dei

7. Propter quod suscipite invicem, sicut et Christus suscepit vos, in gloriam Dei.

8. dico enim Christum Jesum ministrum fuisse circumcisionis propter veritatem Dei ad confirmandas promissiones patrum

8. Dico enim Christum ministrum fuisse circumcisionis propter veritatem Dei ad confirmandas promissiones patrum;

9. gentes autem super misericordiam honorare Deum sicut scriptum est propter hoc confitebor tibi in gentibus et nomini tuo cantabo

9. gentes autem propter misericordiam glorificare Deum, sicut scriptum est: “Propter hoc confitebor tibi in gentibus et nomini tuo cantabo”.

10. et iterum dicit lætamini gentes cum plebe ejus

10. Et iterum dicit: “Laetamini, gentes, cum plebe eius”.

11. et iterum laudate omnes gentes Dominum et magnificate eum omnes populi

11. Et iterum: “Laudate, omnes gentes, Dominum, et magnificent eum omnes populi”.

12. et rursus Esajas ait erit radix Jesse et qui exsurget regere gentes in eo gentes sperabunt

12. Et rursus Isaias ait: “Erit radix Iesse, et qui exsurget regere gentes: in eo gentes sperabunt”.

13. Deus autem spei repleat vos omni gaudio et pace in credendo ut abundetis in spe in virtute Spiritus Sancti

13. Deus autem spei repleat vos omni gaudio et pace in credendo, ut abundetis in spe in virtute Spiritus Sancti.

14. certus sum autem fratres mei et ego ipse de vobis quoniam et ipsi pleni estis dilectione repleti omni scientia ita ut possitis alterutrum monere

14. Certus sum autem, fratres mei, et ego ipse de vobis, quoniam et ipsi pleni estis bonitate, repleti omni scientia, ita ut possitis et alterutrum monere.

15. audacius autem scripsi vobis fratres ex parte tamquam in memoriam vos reducens propter gratiam quæ data est mihi a Deo

15. Audacius autem scripsi vobis ex parte, tamquam in memoriam vos reducens propter gratiam, quae data est mihi a Deo,

16. ut sim minister Christi Jesu in gentibus sanctificans evangelium Dei ut fiat oblatio gentium accepta sanctificata in Spiritu Sancto

16. ut sim minister Christi Iesu ad gentes, consecrans evangelium Dei, ut fiat oblatio gentium accepta, sanctificata in Spiritu Sancto.

17. habeo igitur gloriam in Christo Jesu ad Deum

17. Habeo igitur gloriationem in Christo Iesu ad Deum;

18. non enim audeo aliquid loqui eorum quæ per me non effecit Christus in obœdientiam gentium verbo et factis

18. non enim audebo aliquid loqui eorum, quae per me non effecit Christus in oboedientiam gentium, verbo et factis,

19. in virtute signorum et prodigiorum in virtute Spiritus Sancti ita ut ab Hierusalem per circuitum usque in Illyricum repleverim evangelium Christi

19. in virtute signorum et prodigiorum, in virtute Spiritus, ita ut ab Ierusalem et per circuitum usque in Illyricum repleverim evangelium Christi,

20. sic autem hoc prædicavi evangelium non ubi nominatus est Christus ne super alienum fundamentum ædificarem

20. sic autem contendens praedicare evangelium, non ubi nominatus est Christus, ne super alienum fundamentum aedificarem,

21. sed sicut scriptum est quibus non est adnuntiatum de eo videbunt et qui non audierunt intellegent

21. sed sicut scriptum est: “Quibus non est annuntiatum de eo, videbunt; et, qui non audierunt, intellegent”.

22. propter quod et inpediebar plurimum venire ad vos

22. Propter quod et impediebar plurimum venire ad vos;

23. nunc vero ulterius locum non habens in his regionibus cupiditatem autem habens veniendi ad vos ex multis jam annis

23. nunc vero ulterius locum non habens in his regionibus, cupiditatem autem habens veniendi ad vos ex multis iam annis,

24. cum in Hispaniam proficisci cœpero spero quod præteriens videam vos et a vobis deducar illuc si vobis primum ex parte fruitus fuero

24. cum in Hispaniam proficisci coepero, spero enim quod praeteriens videam vos et a vobis deducar illuc, si vobis primum ex parte fruitus fuero.

25. nunc igitur proficiscar in Hierusalem ministrare sanctis

25. Nunc autem proficiscor in Ierusalem ministrare sanctis;

26. probaverunt enim Macedonia et Achaja conlationem aliquam facere in pauperes sanctorum qui sunt in Hierusalem

26. probaverunt enim Macedonia et Achaia communicationem aliquam facere in pauperes sanctorum, qui sunt in Ierusalem.

27. placuit enim eis et debitores sunt eorum nam si spiritalium eorum participes facti sunt gentiles debent et in carnalibus ministrare eis

27. Placuit enim eis, et debitores sunt eorum; nam si spiritalibus eorum communicaverunt gentes, debent et in carnalibus ministrare eis.

28. hoc igitur cum consummavero et adsignavero eis fructum hunc proficiscar per vos in Hispaniam

28. Hoc igitur cum consummavero et assignavero eis fructum hunc, proficiscar per vos in Hispaniam;

29. scio autem quoniam veniens ad vos in abundantia benedictionis Christi veniam

29. scio autem quoniam veniens ad vos, in abundantia benedictionis Christi veniam.

30. obsecro igitur vos fratres per Dominum nostrum Jesum Christum et per caritatem Spiritus ut adiuvetis me in orationibus pro me ad Deum

30. Obsecro autem vos, fratres, per Dominum nostrum Iesum Christum et per caritatem Spiritus, ut concertemini mecum in orationibus pro me ad Deum,

31. ut liberer ab infidelibus qui sunt in Judæa et obsequii mei oblatio accepta fiat in Hierosolyma sanctis

31. ut liberer ab infidelibus, qui sunt in Iudaea, et ministerium meum pro Ierusalem acceptum sit sanctis,

32. ut veniam ad vos in gaudio per voluntatem Dei et refrigerer vobiscum

32. ut veniens ad vos in gaudio per voluntatem Dei refrigerer vobiscum.

33. Deus autem pacis sit cum omnibus vobis amen

33. Deus autem pacis sit cum omnibus vobis. Amen.