1 et introivit iterum synagogam et erat ibi homo habens manum aridam
2 et observabant eum si sabbatis curaret ut accusarent illum
3 et ait homini habenti manum aridam surge in medium
4 et dicit eis licet sabbatis bene facere an male animam salvam facere an perdere at illi tacebant
5 et circumspiciens eos cum ira contristatus super cæcitatem cordis eorum dicit homini extende manum tuam et extendit et restituta est manus illi
6 exeuntes autem statim Pharisæi cum Herodianis consilium faciebant adversus eum quomodo eum perderent
7 et Jesus cum discipulis suis secessit ad mare et multa turba a Galilæa et Judæa secuta est eum
8 et ab Hierosolymis et ab Idumea et trans Jordanen et qui circa Tyrum et Sidonem multitudo magna audientes quæ faciebat venerunt ad eum
9 et dixit discipulis suis ut navicula sibi deserviret propter turbam ne conprimerent eum
10 multos enim sanabat ita ut inruerent in eum ut illum tangerent quotquot habebant plagas
11 et spiritus inmundi cum illum videbant procidebant ei et clamabant dicentes
12 tu es Filius Dei et vehementer comminabatur eis ne manifestarent illum
13 et ascendens in montem vocavit ad se quos voluit ipse et venerunt ad eum
14 et fecit ut essent duodecim cum illo et ut mitteret eos prædicare
15 et dedit illis potestatem curandi infirmitates et eiciendi dæmonia
16 et inposuit Simoni nomen Petrus
17 et Jacobum Zebedæi et Johannem fratrem Jacobi et inposuit eis nomina Boanerges quod est Filii tonitrui
18 et Andream et Philippum et Bartholomeum et Mattheum et Thomam et Jacobum Alphei et Thaddeum et Simonem Cananeum
19 et Judam Scarioth qui et tradidit illum
20 et veniunt ad domum et convenit iterum turba ita ut non possent neque panem manducare
21 et cum audissent sui exierunt tenere eum dicebant enim quoniam in furorem versus est
22 et scribæ qui ab Hierosolymis descenderant dicebant quoniam Beelzebub habet et quia in principe dæmonum eicit dæmonia
23 et convocatis eis in parabolis dicebat illis quomodo potest Satanas Satanan eicere
24 et si regnum in se dividatur non potest stare regnum illud
25 et si domus super semet ipsam dispertiatur non poterit domus illa stare
26 et si Satanas consurrexit in semet ipsum dispertitus est et non potest stare sed finem habet
27 nemo potest vasa fortis ingressus in domum diripere nisi prius fortem alliget et tunc domum ejus diripiet
28 amen dico vobis quoniam omnia dimittentur filiis hominum peccata et blasphemiæ quibus blasphemaverint
29 qui autem blasphemaverit in Spiritum Sanctum non habet remissionem in æternum sed reus erit æterni delicti
30 quoniam dicebant spiritum inmundum habet
31 et veniunt mater ejus et fratres et foris stantes miserunt ad eum vocantes eum
32 et sedebat circa eum turba et dicunt ei ecce mater tua et fratres tui foris quærunt te
33 et respondens eis ait quæ est mater mea et fratres mei
34 et circumspiciens eos qui in circuitu ejus sedebant ait ecce mater mea et fratres mei
35 qui enim fecerit voluntatem Dei hic frater meus et soror mea et mater est
Rozdziały: