1. respondens autem Dominus Job de turbine ait

2. accinge sicut vir lumbos tuos interrogabo te et indica mihi

3. numquid irritum facies judicium meum et condemnabis me ut tu justificeris

4. et si habes brachium sicut Deus et si voce simili tonas

5. circumda tibi decorem et in sublime erigere et esto gloriosus et speciosis induere vestibus

6. disperge superbos furore tuo et respiciens omnem arrogantem humilia

7. respice cunctos superbos et confunde eos et contere impios in loco suo

8. absconde eos in pulvere simul et facies eorum demerge in foveam

9. et ego confitebor quod salvare te possit dextera tua

10. ecce Behemoth quem feci tecum fænum quasi bos comedet

11. fortitudo ejus in lumbis ejus et virtus illius in umbilicis ventris ejus

12. constringit caudam suam quasi cedrum nervi testiculorum ejus perplexi sunt

13. ossa ejus velut fistulæ æris cartilago illius quasi lamminæ ferreæ

14. ipse principium est viarum Dei qui fecit eum adplicabit gladium ejus

15. huic montes herbas ferunt omnes bestiæ agri ludent ibi

16. sub umbra dormit in secreto calami et locis humentibus

17. protegunt umbræ umbram ejus circumdabunt eum salices torrentis

18. ecce absorbebit fluvium et non mirabitur habet fiduciam quod influat Jordanis in os ejus

19. in oculis ejus quasi hamo capiet eum et in sudibus perforabit nares ejus

20. an extrahere poteris Leviathan hamo et fune ligabis linguam ejus

21. numquid pones circulum in naribus ejus et armilla perforabis maxillam ejus

22. numquid multiplicabit ad te preces aut loquetur tibi mollia

23. numquid feriet tecum pactum et accipies eum servum sempiternum

24. numquid inludes ei quasi avi aut ligabis illum ancillis tuis

25. concident eum amici divident illum negotiatores

26. numquid implebis sagenas pelle ejus et gurgustium piscium capite illius

27. pone super eum manum tuam memento belli nec ultra addas loqui

28. ecce spes ejus frustrabitur eum et videntibus cunctis præcipitabitur



Livros sugeridos


“Para mim, Deus está sempre fixo na minha mente e estampado no meu coração.” São Padre Pio de Pietrelcina

Newsletter

Receba as novidades, artigos e noticias deste portal.