1. qui vivit in æternum creavit omnia simul Deus solus justificabitur et manet invictus rex in æternum

2. quis sufficit enarrare opera illius

3. quis enim investigabit magnalia ejus

4. virtutem autem magnitudinis ejus quis enuntiabit et quis adiciet enarrare misericordiam ejus

5. non est minuere neque adicere nec est invenire magnalia Dei

6. cum consummaverit homo tunc incipit et cum quieverit operabitur

7. quid homo et quæ gratia illius et quid bonum aut quid nequam illius

8. numerus dierum hominum multum centum anni quasi guttæ aquæ a mare et sicut calculus harenæ sic exigui anni in die ævi

9. propter hoc patiens est Deus in illis et effudit super eos misericordiam suam

10. vidit præsumptionem cordis illorum quoniam mala est et cognovit subversionem illorum quoniam nequa est

11. ideo adimplevit propitiationem suam in illis et ostendit illis viam æquitatis

12. miseratio hominis circa proximum suum misericordia autem Dei super omnem carnem

13. qui misericordiam habet et docet erudit quasi pastor gregem suum

14. misereatur excipiens doctrinam miserationis et qui festinant in judiciis ejus

15. fili in bonis non des querellam et omni dato non des tristitiam verbi mali

16. nonne ardorem refrigerabit ros sic et verbum melius quam datus

17. nonne ecce verbum super datum bonum et utraque cum homine justificato

18. stultus achariter inproperabit et datus indisciplinati tabescere facit oculos

19. ante judicium para justitiam tibi et antequam loquaris disce

20. ante languorem adhibe medicinam et ante judicium interroga te ipsum et in conspectu Dei invenies propitiationem

21. ante languorem humilia te et in tempore infirmitatum ostende conversationem tuam

22. non inpediaris operari semper et non veteris usque ad mortem justificari quoniam merces Dei manet in æternum

23. ante orationem præpara animam tuam et noli esse quasi homo qui temptat Deum

24. memento iræ in die consummationis et tempus retributionis in conversatione facies

25. memento paupertatis in tempore abundantiæ et necessitatem paupertatis in die divitiarum

26. a mane usque ad vesperam mutatur tempus et hæc omnia citata in oculis Dei

27. homo sapiens in omnibus metuet et in diebus delictorum adtendet ab inertia

28. omnis astutus agnovit sapientiam et invenienti eam dabit confessionem

29. sensati in verbis et ipsi sapienter egerunt et intellexerunt veritatem et justitiam et inploraverunt proverbia et judicia

30. de continentia animæ post concupiscentias tuas non eas et a voluntate tua avertere

31. si præstes animæ tuæ concupiscentiam ejus faciet te in gaudium inimicis

32. ne oblecteris in turbis nec in modicis ad duas est enim commissio illorum

33. ne fueris mediocris in contentione ex fenore et non est tibi nihil in sacculo eris enim invidus tuæ vitæ





“Jesus vê, conhece e pesa todas as suas ações.” São Padre Pio de Pietrelcina