1. et ego fratres non potui vobis loqui quasi spiritalibus sed quasi carnalibus tamquam parvulis in Christo

2. lac vobis potum dedi non escam nondum enim poteratis sed ne nunc quidem potestis adhuc enim estis carnales

3. cum enim sit inter vos zelus et contentio nonne carnales estis et secundum hominem ambulatis

4. cum enim quis dicit ego quidem sum Pauli alius autem ego Apollo nonne homines estis quid igitur est Apollo quid vero Paulus

5. ministri ejus cui credidistis et unicuique sicut Dominus dedit

6. ego plantavi Apollo rigavit sed Deus incrementum dedit

7. itaque neque qui plantat est aliquid neque qui rigat sed qui incrementum dat Deus

8. qui plantat autem et qui rigat unum sunt unusquisque autem propriam mercedem accipiet secundum suum laborem

9. Dei enim sumus adiutores Dei agricultura estis Dei ædificatio estis

10. secundum gratiam Dei quæ data est mihi ut sapiens architectus fundamentum posui alius autem superædificat unusquisque autem videat quomodo superædificet

11. fundamentum enim aliud nemo potest ponere præter id quod positum est qui est Christus Jesus

12. si quis autem superædificat supra fundamentum hoc aurum argentum lapides pretiosos ligna fænum stipulam

13. uniuscujusque opus manifestum erit dies enim declarabit quia in igne revelabitur et uniuscujusque opus quale sit ignis probabit

14. si cujus opus manserit quod superædificavit mercedem accipiet

15. si cujus opus arserit detrimentum patietur ipse autem salvus erit sic tamen quasi per ignem

16. nescitis quia templum Dei estis et Spiritus Dei habitat in vobis

17. si quis autem templum Dei violaverit disperdet illum Deus templum enim Dei sanctum est quod estis vos

18. nemo se seducat si quis videtur inter vos sapiens esse in hoc sæculo stultus fiat ut sit sapiens

19. sapientia enim hujus mundi stultitia est apud Deum scriptum est enim conprehendam sapientes in astutia eorum

20. et iterum Dominus novit cogitationes sapientium quoniam vanæ sunt

21. itaque nemo glorietur in hominibus omnia enim vestra sunt

22. sive Paulus sive Apollo sive Cephas sive mundus sive vita sive mors sive præsentia sive futura omnia enim vestra sunt

23. vos autem Christi Christus autem Dei





“Enquanto estivermos vivos sempre seremos tentados. A vida é uma contínua luta. Se às vezes há uma trégua é para respirarmos um pouco.” São Padre Pio de Pietrelcina