1. vir autem quidam erat in Cæsarea nomine Cornelius centurio cohortis quæ dicitur Italica

2. religiosus et timens Deum cum omni domo sua faciens elemosynas multas plebi et deprecans Deum semper

3. vidit in visu manifeste quasi hora nona diei angelum Dei intrœuntem ad se et dicentem sibi Corneli

4. at ille intuens eum timore correptus dixit quid est domine dixit autem illi orationes tuæ et elemosynæ tuæ ascenderunt in memoriam in conspectu Dei

5. et nunc mitte viros in Joppen et accersi Simonem quendam qui cognominatur Petrus

6. hic hospitatur apud Simonem quendam coriarium cujus est domus juxta mare

7. et cum discessisset angelus qui loquebatur illi vocavit duos domesticos suos et militem metuentem Dominum ex his qui illi parebant

8. quibus cum narrasset omnia misit illos in Joppen

9. postera autem die iter illis facientibus et adpropinquantibus civitati ascendit Petrus in superiora ut oraret circa horam sextam

10. et cum esuriret voluit gustare parantibus autem eis cecidit super eum mentis excessus

11. et videt cælum apertum et descendens vas quoddam velut linteum magnum quattuor initiis submitti de cælo in terram

12. in quo erant omnia quadrupedia et serpentia terræ et volatilia cæli

13. et facta est vox ad eum surge Petre et occide et manduca

14. ait autem Petrus absit Domine quia numquam manducavi omne commune et inmundum

15. et vox iterum secundo ad eum quæ Deus purificavit ne tu commune dixeris

16. hoc autem factum est per ter et statim receptum est vas in cælum

17. et dum intra se hæsitaret Petrus quidnam esset visio quam vidisset ecce viri qui missi erant a Cornelio inquirentes domum Simonis adstiterunt ad januam

18. et cum vocassent interrogabant si Simon qui cognominatur Petrus illic haberet hospitium

19. Petro autem cogitante de visione dixit Spiritus ei ecce viri tres quærunt te

20. surge itaque et descende et vade cum eis nihil dubitans quia ego misi illos

21. descendens autem Petrus ad viros dixit ecce ego sum quem quæritis quæ causa est propter quam venistis

22. qui dixerunt Cornelius centurio vir justus et timens Deum et testimonium habens ab universa gente Judæorum responsum accepit ab angelo sancto accersire te in domum suam et audire verba abs te

23. introducens igitur eos recepit hospitio sequenti autem die surgens profectus est cum eis et quidam ex fratribus ab Joppe comitati sunt eum

24. altera autem die introivit Cæsaream Cornelius vero expectabat illos convocatis cognatis suis et necessariis amicis

25. et factum est cum introisset Petrus obvius ei Cornelius et procidens ad pedes adoravit

26. Petrus vero levavit eum dicens surge et ego ipse homo sum

27. et loquens cum illo intravit et invenit multos qui convenerant

28. dixitque ad illos vos scitis quomodo abominatum sit viro judæo coniungi aut accedere ad alienigenam et mihi ostendit Deus neminem communem aut inmundum dicere hominem

29. propter quod sine dubitatione veni accersitus interrogo ergo quam ob causam accersistis me

30. et Cornelius ait a nudius quartana die usque in hanc horam orans eram hora nona in domo mea et ecce vir stetit ante me in veste candida et ait

31. Corneli exaudita est oratio tua et elemosynæ tuæ commemoratæ sunt in conspectu Dei

32. mitte ergo in Joppen et accersi Simonem qui cognominatur Petrus hic hospitatur in domo Simonis coriarii juxta mare

33. confestim igitur misi ad te et tu bene fecisti veniendo nunc ergo omnes nos in conspectu tuo adsumus audire omnia quæcumque tibi præcepta sunt a Domino

34. aperiens autem Petrus os dixit in veritate conperi quoniam non est personarum acceptor Deus

35. sed in omni gente qui timet eum et operatur justitiam acceptus est illi

36. verbum misit filiis Israël adnuntians pacem per Jesum Christum hic est omnium Dominus

37. vos scitis quod factum est verbum per universam Judæam incipiens enim a Galilæa post baptismum quod prædicavit Johannes

38. Jesum a Nazareth quomodo unxit eum Deus Spiritu Sancto et virtute qui pertransivit benefaciendo et sanando omnes oppressos a diabolo quoniam Deus erat cum illo

39. et nos testes sumus omnium quæ fecit in regione Judæorum et Hierusalem quem et occiderunt suspendentes in ligno

40. hunc Deus suscitavit tertia die et dedit eum manifestum fieri

41. non omni populo sed testibus præordinatis a Deo nobis qui manducavimus et bibimus cum illo postquam resurrexit a mortuis

42. et præcepit nobis prædicare populo et testificari quia ipse est qui constitutus est a Deo judex vivorum et mortuorum

43. huic omnes prophetæ testimonium perhibent remissionem peccatorum accipere per nomen ejus omnes qui credunt in eum

44. adhuc loquente Petro verba hæc cecidit Spiritus Sanctus super omnes qui audiebant verbum

45. et obstipuerunt ex circumcisione fideles qui venerant cum Petro quia et in nationes gratia Spiritus Sancti effusa est

46. audiebant enim illos loquentes linguis et magnificantes Deum

47. tunc respondit Petrus numquid aquam quis prohibere potest ut non baptizentur hii qui Spiritum Sanctum acceperunt sicut et nos

48. et jussit eos in nomine Jesu Christi baptizari tunc rogaverunt eum ut maneret aliquot diebus





“Aquele que procura a vaidade das roupas não conseguirá jamais se revestir com a vida de Jesus Cristo.” São Padre Pio de Pietrelcina