Liber Ecclesiasticus, 45
1. dilectus a Deo et hominibus Moses cujus memoria in benedictione est
2. similem illum fecit in gloria sanctorum et magnificavit eum in timore inimicorum et in verbis suis monstra placavit
3. glorificavit illum in conspectu regum et jussit illi coram populo suo et ostendit illi gloriam suam
4. in fide et lenitate ipsius sanctum fecit illum et elegit illum de omni carne
5. audivit eum et vocem ipsius et induxit illum in nubem
6. et dedit illi coram præcepta legem vitæ et disciplinæ docere Jacob testamentum et judicia sua Israël
7. excelsum fecit Aaron fratrem ejus et similem sibi de tribu Levi
8. statuit ei testamentum æternum et dedit illi sacerdotium gentis et beatificavit illum in gloria
9. et circumcinxit illum zonam gloriæ induit illum stolam gloriæ et coronavit illum in vasis virtutis
10. circumpedes et femoralia et umeralem posuit ei et cinxit illum tintinabulis aureis plurimis in gyro
11. dare sonitum in successu suo auditum facere sonitum in templo in memoriam filiis gentis suæ
12. stola sancta auro et hyacintho et purpura opus textile viri sapientis judicio et veritate præditi
13. torto cocco opus artificis gemmis pretiosis figuratis in ligatura auri et opere lapidarii sculptilis in memoriam secundum numerum tribuum Israël
14. coronam auream supra mitram ejus expressam signo sanctitatis gloria honoris et opus virtutis desideria oculorum ornata
15. sic pulchra ante ipsum non fuerunt talia usque ad originem
16. non indutus est illa alienigena aliquis sed tantum filii ipsius soli et nepotes ejus per omne tempus
17. sacrificia ipsius consumpta sunt igni cotidie
18. conplevit Moses manus ejus et unxit illum oleo sancto
19. factum est illi in testamentum æternum et semini ejus sicut dies cæli fungi sacerdotio et habere laudem et glorificare populum suum in nomine suo
20. ipsum elegit eum ab omni vivente adferre sacrificium Deo incensum et bonum odorem in memoriam placere populo suo
21. dedit illi in præceptis suis potestatem in testamentis judiciorum docere Jacob testimonia et in lege sua lucem dare Israël
22. quia contra illum steterunt alieni et propter invidiam circumdederunt illum in deserto homines qui erant cum Dathan et Abiron et congregatio Chore in iracundiam
23. vidit Dominus Deus et non placuit illi et consumpti sunt in impetu iracundiæ
24. fecit illis monstra et consumpsit eos in flamma ignis
25. et addidit Aaron gloriam et dedit illi hereditatem et primitias fructuum terræ divisit illi
26. panem ipsis in primis paravit in satietatem nam sacrificia Domini edent quæ dedit ipsi et semini ejus
27. ceterum in terra gentes hereditabit et pars non est illi in gente ipse enim pars ejus est et hereditas
28. et Finees filius Eleazari tertius in gloria est in imitando tantum in timore Domini
29. et stare in reverentia gentis in bonitate et alacritate animæ suæ placuit de Israël
30. ideo statuit ad illum testamentum pacis principem sanctorum et gentis suæ ut sit illi in sacerdotium sui dignitas in æternum
31. et testamentum David regi filio Jesse de tribu Juda hereditas ipsi et semini ejus ut daret sapientiam in cor nostrum judicare gentem suam in justitia ne abolerentur bona ipsorum et gloriam eorum in gentem ipsorum æternam fecit
